Россиядаги ўзбекистонлик муҳожирларга Ўзбекистонда ёшлигидан масжидларга бормагани ёки диний таълим олмагани панд бермоқда. Бундай фикрни Москва шаҳрида меҳнат муҳожирларининг ҳуқуқини ҳимоя қилиш маркази юристи Ботиржон Шерматов «Azon.uz» нашрига берган интервьюсида айтиб ўтди.
– Айрим фикрларга кўра, Сурия, Ироқ ва Афғонистон каби давлатларга кетиб қолаётган баъзи юртдошларимиз айнан Россиядаги маърузалар ва даъватлар таъсирида жиҳодчилар сафига қўшилиб кетмоқда. Сизнингча, бу қанчалик ҳақиқатга яқин? Агар ҳақиқат бўлса, кўпроқ кимлар бунга мойил бўлмоқда?
– Албатта, мен ҳуқуқшунос сифатида фаолият олиб бораман ҳамда ҳар қандай масалага одатда ҳуқуқий жиҳатдан ёндашишга ҳаракат қиламан. Шу сабабли бу борада аниқ бир нима дейиш қийин, лекин ўз шахсий мулоҳазаларимни билдириб ўтишим мумкин. Россиядаги олимлар, имомлар одатда ўз маърузаларини рус ва татар тилларида қилишади. Бизнинг юртдошларимиз рус тилидаги маърузаларни яхши тушунмагани учун масжидларга илм олиш учун эмас, балки фақатгина ибодат қилиш учун боришади, жума маърузаларини тушунишмайди. Кучли билимга эга бўлган Шамил Алавутдинов ва бошқа уламолар ҳам фақат рус тилида маърузалар қилади, диний китоблар ва интернет сайтлари ҳам рус тилида фаолият олиб боради.
Масжидлардаги ҳолат ҳам бемалол, ҳар ким келиб ўз ибодатини ўз мазҳабида адо этиб кетади. Авваллари ким хоҳласа келиб маъруза қилиб кетарди, энди фақат расмий имомлар ёки улар билан маслаҳатлашиб бошқа олимлар келиб маъруза қилмоқда.
Ўзбекистонлик кўпчилик мигрантлар эса Россияга келганидан кейингина динни ўргана бошлайди, ҳатто кўпчилиги умрида намоз ўқимаган кишилар бўлади. Бу ерда хонадошларидан ёки масжидда ўрганади. Ўзбекистонда ёшлигидан масжидларга бормагани ёки диний таълим олмагани бу ерда панд бермоқда. Менимча, шунинг учун бу ерда бирор адашган фирқанинг таъсирига тезда тушиб қолади ҳамда дарров уларга ишониб қолмоқда. Менинг таклифим, Ўзбекистон Мусулмонлар идораси бу масалага жиддий ёндашиб, Россияда меҳнат қилаётган фуқароларимизни диний-маърифий саводхонлигини ошириш билан шуғулланиши лозим. Бунинг учун бир ойда бир маротаба имом домлаларимизнинг Россия Федерациясидаги фуқароларимиз кўп бўлган минтақаларига юборилиши, меҳнат муҳожирларининг Ислом динига алоқадор саволларига жавоб бериб, суҳбатлар ўтказиб туриши керак.
Бундай ҳолатларни олдини олиш учун Россия мусулмонлари идораси ва маҳаллий имомлар томонидан ҳам кўплаб маърузалар қилиниб, тушунтириш ишлари олиб борилмоқда. Шунингдек, Васатия маркази, Шайх Муҳаммад Содиқ Муҳаммад Юсуф номидаги диний-маърифий марказ ва «Аиша» аёллар марказлари бу борада анча ташаббус кўрсатмоқда. Хусусан, Шайх Муҳаммад Содиқ Муҳаммад Юсуф ҳазратлари номидаги марказ ҳазратнинг китобларини бепул тарқатади, рус тилига таржима қилиб, жазони ижро этиш муассасаларига ҳам тарқатади.
Изоҳ (0)