Кеча, 16 июль куни Тошкентда UzReport Ахборот агентлиги (UzReport-TV ва Futbol-TV телеканаллари) ҳамда Халқаро пресс клуб ҳамкорликда «ФИФА Жаҳон чемпионати—2018: миллионлар ўйини, жонли трансляция ва футбол завқи» мавзусида матбуот анжуманини ташкил этди.
Анжуманда иштирок этган ўзбекистонлик ФИФА рефериси, Жаҳон Чемпионатлари ўйин ўтказиш бўйича мутлақ рекордчи бўлган Равшан Эрматов видетакрорлар тизимига ўз муносабатини билдириб ўтди.
«VAR – бу энди биринчи қадам, холос. Мухлислар бу тизимдан кўпроқ нарсани хоҳлашмоқда. Тизим 100 фоиз тўғри ишлаяпти десак, ёлғон бўлади. Бироқ сиз юришни ўрганмай туриб, югуриб кетолмайсиз. VAR тизими ҳам энди «юриш»ни ўрганяпти. VAR тизимини жуда ҳам ижобий баҳолаган бўлардим. Керакли ва фойдали инструмент, деб ҳисоблайман. У тўрттагина вазиятда қўлланилади. Гол ёки гол эмаслигини, пенальти ёки ундай эмаслигини, қизил карточкага тортадими ёки йўқ, шуни аниқлашда, шунингдек, ҳакам адашиб бошқа футболчига карточка кўрсатмаслигининг олдини олишда ишлатилади. Жаҳон чемпионати давомида, менимча, икки ё уч маротаба бу тизимдан фойдаланилди. Кўп ўйинларда ҳакамлар VAR ёрдамисиз ҳам ўз ишларини яхши уддалади. Мана кечаги финалда ҳам битта вазият бўлди. Ҳакам борди, кўрди, ўзи ишонч ҳосил қилди ва тўғри қарор чиқарди. Бу, менимча, биринчи ўринда футболнинг шаффофлигини таъминлайдиган инструмент сифатида хизмат қилади. Ўзбекистонда ҳам бу тизим томон секин-секин қадам қўя бошласак, ёмон бўлмасди»—деди Эрматов.
Изоҳ (0)