Кеча, 15 июль куни Жаҳон чемпиони, Рио-2016 Олимпиадаси финалчиси Шаҳрам Ғиёсов ўзининг проф боксдаги 3-жангида мексикалик Даниэл Эчеверрияга қарши рингга чиқди.
Жанг 1-раунднинг ўзидаёқ якунига етди. Шаҳрамнинг кучли зарбасидан Даниэл нокаутга учради ва жангни давом эттира олмади. Миллий олимпия қўмитаси матбуот хизмати эса боксчидан жангдан сўнг қисқа интервью олди.
«Фурсатдан фойдаланиб, мени қўллаб-қувватлаб турган барчага миннатдорчилик билдирмоқчиман. Жанг ҳақида гапирадиган бўлсам, у узоқ давом этмаган бўлса-да менга маъқул келди. Айтиб ўтганимдек, жангга қаттиқ тайёрлангандим. Мураббий билан бирга ўйлаган режаларимиз амалга ошди. Рақибнинг кучсиз томонларини билардик ва айнан шу томонлама устунликка эришдик. Бундан буёғига машғулотларни давом эттирамиз ва томошабоп жанглар кўрсатишда давом этамиз», – деди Шаҳрам.
Маълумот учун ўзбекистонлик боксчи бунгача проф рингда 2 та жанг ўтказиб, уларнинг ҳар иккисида ғалаба қозонганди (1 таси нокаут билан). Мексикалик боксчи эса 24 та жанг ўтказиб, уларнинг 19 тасида ғалаба қозонган (17 таси нокаут). 5 та жангда мағлубиятга учраганди (2 таси нокаут).
Шу тариқа Ғиёсов проф боксдаги ўзининг 3 ғалабасига эришди.
Изоҳ (0)