Kecha, 16-iyul kuni Toshkentda UzReport Axborot agentligi (UzReport-TV va Futbol-TV telekanallari) hamda Xalqaro press klub hamkorlikda “FIFA Jahon chempionati—2018: millionlar o‘yini, jonli translyatsiya va futbol zavqi” mavzusida matbuot anjumanini tashkil etdi.
Anjumanda ishtirok etgan o‘zbekistonlik FIFA referisi, Jahon Chempionatlari o‘yin o‘tkazish bo‘yicha mutlaq rekordchi bo‘lgan Ravshan Ermatov videtakrorlar tizimiga o‘z munosabatini bildirib o‘tdi.
“VAR – bu endi birinchi qadam, xolos. Muxlislar bu tizimdan ko‘proq narsani xohlashmoqda. Tizim 100 foiz to‘g‘ri ishlayapti desak, yolg‘on bo‘ladi. Biroq siz yurishni o‘rganmay turib, yugurib ketolmaysiz. VAR tizimi ham endi “yurish”ni o‘rganyapti. VAR tizimini juda ham ijobiy baholagan bo‘lardim. Kerakli va foydali instrument, deb hisoblayman. U to‘rttagina vaziyatda qo‘llaniladi. Gol yoki gol emasligini, penalti yoki unday emasligini, qizil kartochkaga tortadimi yoki yo‘q, shuni aniqlashda, shuningdek, hakam adashib boshqa futbolchiga kartochka ko‘rsatmasligining oldini olishda ishlatiladi. Jahon chempionati davomida, menimcha, ikki yo uch marotaba bu tizimdan foydalanildi. Ko‘p o‘yinlarda hakamlar VAR yordamisiz ham o‘z ishlarini yaxshi uddaladi. Mana kechagi finalda ham bitta vaziyat bo‘ldi. Hakam bordi, ko‘rdi, o‘zi ishonch hosil qildi va to‘g‘ri qaror chiqardi. Bu, menimcha, birinchi o‘rinda futbolning shaffofligini ta’minlaydigan instrument sifatida xizmat qiladi. O‘zbekistonda ham bu tizim tomon sekin-sekin qadam qo‘ya boshlasak, yomon bo‘lmasdi”—dedi Ermatov.
Izoh (0)