Ўзбекистон Республикаси Адлия вазирлигининг 2018 йилнинг 6 ой давомида амалга оширилган ишлар якуни, йўл қўйилган камчиликлар ва келгусида бажарилиши лозим бўлган устувор вазифаларга бағишланган кенгайтирилган ҳайъат мажлиси бўлиб ўтди. Бу ҳақда вазирликнинг жамоатчилик билан алоқалар бўлими хабар бермоқда.
Ҳайъат мажлиси видеконференцалоқа шаклида ўтказилиб, унда адлия органлари ва муассасаларининг барча даражадаги раҳбар ва масъул ходимлари тўлиқ иштирок этди.
Мажлисда бугунги кунда адлия органлари фаолиятидаги мавжуд муаммолар, уларни бартараф этишнинг ташкилий-ҳуқуқий чора-тадбирлари ҳамда Ўзбекистон Республикаси Президенти Шавкат Мирзиёевнинг соҳага доир билдирган танқидий фикрлари ва кўрсатмаларини сўзсиз бажаришга оид ишлар муҳокама этилди.
Адлия вазирлиги томонидан давлат ва жамият ҳаётининг муҳим масалаларини тартибга солишга қаратилган 121 та қонун ҳужжатлари, шу жумладан 29 та қонун лойиҳалари ишлаб чиқилиб, уларнинг сони ўтган даврга нисбатан икки бараварга ошди. Ҳуқуқий экспертизадан ўтказилган лойиҳалар сонининг ҳам икки бараварга ошиши, норма ижодкорлиги соҳасининг нақадар самарали бўлганлигини кўрсатди.
Адлия тизимини аҳоли билан мулоқоти тубдан ўзгарди, интернет ва ижтимоий тармоқлар орқали аҳоли билан яқиндан мулоқот қилишнинг янги, замонавий ва таъсирчан шакллари амалиётга жорий этилди.
Адлия вазирлигига келиб тушган шикоятларнинг сони ўтган йилнинг мос даврига нисбатан 12 мингдан 6 минггача камайди. Энг асосийси, нотариуслар ҳаракатларидан норози бўлиб тушаётган мурожаатлар салмоғининг 2 баробарга камайишига эришилди.
Бунинг учун адлия органлари ва муассасалари фаолиятини кенг ёритиш бўйича ахборот-таҳлилий ва обзорли медиа материалларни тайёрлаш мақсадида вазирлик ҳузурида Ахборот-таҳлил мультимедиа маркази ташкил этилди.
Давлат хизматлари марказлари соҳасида ислоҳотлар ҳам самарали давом эттирилди. Улар томонидан кўрсатиладиган хизматлар сони ҳам 18 тадан 85 тагача оширилиши таъминланди. 16 та хизмат турлари бўйича ишлаб чиқилган регламентлар Ҳукумат томонидан қабул қилинди.
Ҳайъат мажлисида асосий эътибор мавжуд хато ва камчиликлар ҳамда уларнинг илдизларини пухта танқидий таҳлил қилишга, фаолиятдаги муаммоларни очиқ-ошкора муҳокама қилишга қаратилди.
Хусусан, аҳолига ҳуқуқий хизмат кўрсатиш ишларини ташкил қилишда айрим тизимли муаммолар мавжудлиги, нотариал идоралар ва давлат хизматлари марказлари ходимлари томонидан фуқароларга хизмат кўрсатишда жиддий камчиликлар кўзга ташланаётганлиги, туманлар (шаҳарлар) адлия бўлимлари ўзларига юклатилган вазифаларни бажаришга жиддий ёндашмаётганлиги, аҳоли билан тўғридан-тўғри мулоқот қилиш, халқ ичига кириб бориш фаолияти талаб даражасидан анча йироқлиги, айрим ҳудуддаги аҳоли адлия бўлимлари фаолияти ташкил этилганлигидан бехабар эканлиги, соҳани такомиллаштириш ва аҳолига қулайликлар яратишдаги муаммоларни ҳал этишда раҳбарларда шахсий ташаббус ва талабчанликнинг етарли бўлмаётганлиги, мавжуд амалиётни яхшилаш юзасидан аниқ мақсадга йўналтирилган таклифларни ишлаб чиқиш ва уларни оммалаштириш бўйича ишлар қониқарсиз олиб борилаётганлиги алоҳида қайд этилди.
Изоҳ (0)