Наманганда «Адиблар хиёбони» очилди

Намангандаги анъанавий Машрабхонлик ҳафталиги бир қатор янгиликларга бой бўлди. Бу ҳақда вилоят ҳокимлиги ахборот хизмати хабар бермоқда.

Шоир ҳайкали қад ростлаган майдон «Адиблар хиёбони» деб номланиб, бу ерда ўзбек адабиётига салмоқли ҳисса қўшган Нодим Намангоний, Ҳилватий, Муҳаммадшариф Сўфизода, Ишоқхон тўра Ибрат, Набихон Чустий, Рафиқ Мўмин, Усмон Носир, Зафар Диёр, Ҳусниддин Шарипов ва Ҳабиб Саъдулла сингари 10 нафар адибнинг бюсти жой олди.

Пойтахт Тошкентдан кейин иккинчи бўлиб ташкил этилган «Адиблар хиёбони» очилишида «Шарқ юлдузи» журнали муҳаррири Сирожиддин Рауф, «Ер юзи» журнали муҳаррири Ҳумоюн Акбар Наманган адабиётга, шу заминда туғилиб-ўсган ижодкорларга берилаётган эътиборни эътироф этди.

«Адиблар хиёбони»дан бюсти ўрин олган сиймоларнинг оила аъзолари номидан адабиётшунос Рустам Шарипов сўз олиб, бунга бош қўшган мутасаддилар, адабий жамоатчилик, ҳайкалтарошларга самимий миннатдорлик билдирди.

Тадбирда вилоят театри ижодий жамоаси томонидан тайёрланган Абдулла Жабборнинг «Кўрголи келдим» драмаси асосида тайёрланган композиция намойиш этилди.

Машрабхонлик ҳафталиги доирасидаги тадбирлар Наманган Давлат университетида ташкил этилган илмий-амалий анжуманга уланиб кетди.