Японияда жала ҳамда улар туфайли юз берган сув тошқинлари ва ер кўчишлари оқибатида ҳалок бўлганлар сони 204 тага етди. Бу ҳақда мамлакат полицияси бош бошқармасининг 13 июль, жума куни берган маълумотига таяниб, «ТАСС» хабар берди.
Табиий офат оқибатида 60 дан ортиқ киши бедарак йўқолган. Фавқулодда ҳолат хизматлари полиция ва мамлакат мудофаа кучлари аскарлари кўмагида қидирув ва қутқариш ишларини давом эттирмоқда.
Японияда ўтган ҳафта ўрталарида «Прапирун» тайфуни кучли жалани келтириб чиқарган. Бу эса дарёлар сувининг кўпайиши ва ер кўчишларига олиб келган. 1953 йилдан буён Японияда сув тошқини оқибатида энг катта миқдордаги қурбонлар шу ҳафта ичида қайд этилган. 1953 йили мамлакат ғарбидаги Кюсю оролида 759 киши ҳалок бўлган, 450 мингдан ортиқ киши бошпанасиз қолган.
Эслатиб ўтамиз, табиий офатдан Хиросима префектураси энг кўп жабр кўрган. 8 июль, якшанба куни сув тошқинлари қурбонлари сони 80 кишидан ошган. 10 июль, сешанба куни ҳалок бўлганлар 140 кишини ташкил қилгани хабар қилинган, сўнг куннинг иккинчи ярмида қурбонлар сони 157 тага етган. 11 июль, чоршанба куни 176 кишининг ҳалок бўлгани маълум қилинган.
Изоҳ (0)