Таиланддаги маҳаллий ўсмирлар футбол жамоасининг 12 нафар аъзоси ва уларнинг мураббийи қутқариб олинган Тхам Луанг ғори бутун ёмғирлар мавсуми давомида сайёҳлар учун ёпилади. Бу ҳақда қутқарув операцияси штаби раҳбари Наронгсак Осоттханакон маълум қилди, деб ёзмоқда «РИА Новости».
Штаб раҳбарининг сўзларига кўра, юз берган воқеадан кейин унинг бошқа такрорланмаслиги учун барча ишни қилиш керак. Яқин вақт ичида ғорни ёмғирлар мавсумида сайёҳлар учун ёпиш ҳақида қарор қабул қилинади. Ғор нафақат ёмғирлар мавсумида, балки бир йилда 6—8 ойга ёпилиши мумкин.
Wild Boars ўсмирлар футбол жамоасининг 12 нафар аъзоси ва уларнинг мураббийи 23 июнда йўқолиб қолган. Улар узунлиги етти километр бўлган Тхам Луанг ғорига кирган ва тўсатдан юз берган тошқин сабабли ғор ичида қолиб кетган, сув уларнинг чиқиш жойига қайтишига имкон бермаган. Қидирув ишлари 10 кун давом этган. Улар ғорда тирик, бироқ ҳолдан тойган ҳолда топилган. Қутқарув операцияси уч кун давом этди ва 10 июль куни сўнгги ўсмир ва мураббий ғордан чиқариб олинди.
Изоҳ (0)