«Тадбиркор аёл» Ўзбекистон ишбилармон аёллар ассоциацияси томонидан янги стратегик лойиҳа — «2018—2020 йилларда хотин-қизлар учун бизнес таълим тизимини такомиллаштириш» дастури ишлаб чиқилди. Бу ҳақда ЎзА хабар берди.
Бугунги кунда Ўзбекистонда аёллар тадбиркорлиги ривожланишига тўсқинлик қилаётган муаммолардан бири — иш билан банд бўлмаган хотин-қизлар учун бизнес таълими тизими самарасининг пастлиги. Хусусан, аёлларнинг турмуш тарзи, уларнинг ижтимоий ҳаётдаги роли ва миллий менталитетга мутаносиб ёндашувнинг йўқлиги сабабли ҳам тақдим этилаётган бизнес таълими кутилган натижаларни бермаяпти.
Ушбу муаммони ҳал этиш учун айнан хотин-қизларга хос бўлган тадбиркорлик йўналишларини ривожлантиришга қаратилган таълим дастури, дастурдан кейинги қўллаб-қувватлаш механизмини ўз ичига олган чора-тадбирлар мажмуасидан иборат яхлит тизим ташкил этиш лозим.
Айнан шу чора-тадбирлар мажмуасини ўзида мужассам этган таълим тизими иш самарасини таъминлайди, янги барқарор иш ўринлари яратилишига омил бўлиб, айниқса, қишлоқ жойларда хотин-қизларга хос бўлган нохуш ижтимоий ҳодисалар рўй бериши олдини олади, аёлларнинг ҳаётга қизиқишини орттириб, ўз қобилиятини намоён қилишига имкон беради.
«Тадбиркор аёл» Ўзбекистон ишбилармон аёллар ассоциацияси ўзининг 27 йиллик фаолияти давомида юзлаб бизнес таълим дастурларини амалга оширди. Аёллар тадбиркорлигини ривожлантиришда катта тажриба мактаби яратилди. Жамият хусусиятлари ҳисобга олинган катталар учун бизнес таълим методикаси ишлаб чиқилди, малакали маҳаллий бизнес тренерлар тайёрланди, устозлар, экспертлар гуруҳлари шаклланди. Энг муҳими, маҳаллий хотин-қизлар томонидан ассоциациянинг ўқув дастурларига ишонч пайдо бўлди.
Лойиҳа амалга ошадиган бўлса, 78 минг нафар хотин-қизга бизнес асослари бўйича кўникма ва амалий ёрдам берилади, 50 мингта янги иш ўрни яратилади, қишлоқ жойларида қийин ижтимоий аҳволдаги хотин-қизлар иш билан таъминланиб, салоҳиятларини даромад келтирувчи фаолиятга йўналтириш ҳисобига уларга психологик ва иқтисодий ёрдам кўрсатилади.
Изоҳ (0)