Беларусь президенти Александр Лукашенко Могилевск вилоятидаги «Родина» колхозига борган вақтида «Мисс Беларусь — 2018» танлови ғолиби Мария Василевичга колхоздаги агрокорхонада ишлаб кўришни таклиф қилди, деб хабар беради «РИА Новости».
Қайд этилишича, Лукашенко колхоз ҳудудидаги музейга борган вақтида мамлакат гўзалига қачонлардир корхонани бошқаришга тўғри келиб қолиши эҳтимоли мавжудлигини айтиб, хўжалик раисининг столига ўтиришни таклиф қилган.
«Машенка, буёққа кел, қизим. Кел, сен ‘Купаловск’да қандай кўринар экансан. ‘Купаловск’ка борасан. Ҳисоб-китоб қиласан. Ёки сизларга буни ўргатишмаганмиди?», — деб қизиққан Лукашенко.
Василевич бу таклифни моделлик шартномаси тугаши билан қабул қилишга тайёр эканлигини билдирган.
«Мен аслида тайёрман. Очиғи, мен икки йиллик шартномани имзолаганман, унинг муддати тугаши билан, Александр Григоревич ҳазиллашмаган бўлса, вазифамни адо этишга киришаман», — дейди Василевич.
Мария Василевич миллий танлов якунларига кўра, «Мисс Беларусь — 2018» ғолиби деб топилган. У Беларусь давлат иқтисодиёт университетини тамомлаган.
Изоҳ (0)