Қозоғистонлик қизалоқ 1 йилда 10 ёшга қарийди

Қозоғистоннинг Олмаота шаҳрида 5 ёшли Дина исмли қизга камёб ташхис қўйилди — у 1 йилда 10 ёшга қариб боряпти. Бу ҳақда «Nur.kz» хабар бермоқда.

Динанинг онаси фарзандини ўзга сайёралик деб атайди. Гап шундаки, қизалоқ прогерия номли камёб касалликка чалинган. Бу хасталик оқибатида бола тез қаришни бошлайди. Ҳозир Дина 5 ёшда, бироқ унинг биологик ёши 50 да. Унинг сочлари тўкилган, ташқи кўринишидан ҳам тенгқурларидан фарқ қилади.

Динанинг онаси — Ирина Вдовиченконинг сўзларига қараганда, қизалоқ ўз муддатида, меъёрдаги оғирлик ва бўй билан туғилган. Бироқ туғуруқхонадан чиқиши билан она фарзандининг қорнидаги териси куйгандей кўриниши, оёқдаги териси эса апелсин пўстлоғига ўхшаб қолганини сезган.

«Биринчи ташхисни Динага 1 ойлигида болалар неврологи қўйган. Дастлабки ташхис — тери касаллиги. Бир ёшгача Динанинг териси текис ва силлиқ бўлган. Бироқ 1 ярим ёшида қизалоқ яна ўзгаришни бошлаган, унинг сочлари тўкилиб, Динанинг ўзи ўсишдан тўхтаб қолган. Даволаш ва терапия муолажалари фақатгина вақтинчалик натижани берар эди», — дейди Динанинг онаси Ирина.

2 ёшида қизалоқ ногиронлиги бор деб тан олинган. 2018 йилда генетиклар Динага прогерия ташхисини қўйган. Бугунги кунда қизалоқнинг бўйи — 90 сантиметр, оғирлиги — 10 килограмм.

Ирина қизини хорижда даволатиш ва генетик текширувдан ўтказиш учун пул жамғармоқда. Аёл фарзандини ёлғиз вояга етказади. Оиланинг ўз уйи йўқ, улар Иринанинг акаси билан бирга яшайди.