Жорий йилнинг 5—11 ноябрь кунлари Хитой Халқ Республикасининг молиявий маркази — Шанхайда Хитой Халқаро Импорт ЭКСПО кўргазмаси ўтказилади, деб ёзади ЎзА.
Нуфузли тадбир ўтказилиши муносабати билан Хитой Халқ Республикасининг Ўзбекистондаги элчихонаси савдо-иқтисодий масалалар бўйича маслаҳатчиси Цзинь Юйлунь журналистлар билан учрашиб, кўргазма ҳақида батафсил маълумот берди.
Унинг таъкидлашича, Хитой тижорат вазирлиги, Жаҳон савдо ташкилоти, БМТнинг Савдо ва ривожланиш конференцияси, БМТ саноатни ривожлантириш ташкилоти — ЮНИДО Халқаро Импорт ЭКСПОсини ўтказишга бош-қош бўлади. Учта бўлим — давлат павилонлари, тижорий кўргазма ва юқори даражадаги форумдан иборат кўргазма учун 200 минг квадрат метрдан ортиқ майдон ажратилган. Юйлунь хонимнинг айтишича, ЭКСПО кўргазмага дунёнинг 150 дан ортиқ компания вакилларининг ташриф буюриши кутилмоқда.
Шанхайда ўтказиладиган ЭКСПО-2018 биринчи навбатда бутун дунё мамлакатлари ўртасида савдо-иқтисодий алоқаларни мустаҳкамлаш, жаҳон иқтисодиёти ва савдо соҳасини такомиллаштириш, жаҳон иқтисодиёти ривожи шаффофлигини рағбатлантиришда муҳим аҳамият касб этади.
Савдо-саноат палатаси Ўзбекистондаги корхоналарни мазкур тадбирда қатнашишини таъминлайди. Май ойи охирларида Ўзбекистондан ишчи гуруҳ Хитойга бориб, кўргазмага тайёргарлик жараёни билан яқиндан танишиб қайтди. Ҳозирга қадар Ўзбекистондан тўртта корхона кўргазмада қатнашиш истагини билдирган.
«Биз юртингиздан янада кўп фирма ва компанияларнинг қатнашишини истаймиз», — деди Цзинь Юйлунь.
Изоҳ (0)