БМТ халқаро тижорат ҳуқуқи бўйича комиссиясининг жорий йил май ойида бўлиб ўтган ишчи гуруҳ йиғилишида ва июнь ойида бўлиб ўтган 51-сессиясига Тошкентдаги халқаро Вестминстер университети тижорат ҳуқуқи кафедраси ўқитувчиси Феруза Бобоқулова делегат сифатида таклиф этилди. Бу ҳақда Ёшлар Иттифоқининг Facebook’даги саҳифасида маълум қилинди.
Қайд этиш жоизки, ушбу комиссия йиғилишларида Ўзбекистондан пайтгача делегат иштирок этмаганди. Шунингдек, Феруза жорий йил 21 июнь куни Халқаро савдо палатаси қошидаги Халқаро арбитраж судининг бутунжаҳон кенгашида суд аъзоси этиб тайинланди.
Ўзи ҳам Тошкентдаги халқаро Вестминстер университети битирувчиси бўлган Феруза ўтган йил июлидан бери Praelegal Uzbekistan юридик фирмаси юристи ва халқаро бўлими бошлиғи сифатида фаолият юритиб келмоқда. Бу ерда ишлаш даври мобайнида фирманинг бошқа юристлари билан биргаликда Халқаро арбитраж судида йўл қурилиши соҳасида икки хусусий компания ўртасида юзага келган 22 миллион доллардан ортиқ қийматдаги ишнинг муваффақиятли кўриб чиқилиб, ижобий ҳал бўлишига эришди. Шу билан бирга, ушбу суд томонидан халқаро тижорат арбитражи бўйича ташкил қилинган махсус курсда ўқиб, уни муваффақиятли тугатди.
Ферузанинг халқаро хусусий ҳуқуқ ҳамда халқаро тижорат арбитражи соҳасидаги эришган ютуқлари ва амалга оширган ишлари юқори баҳоланиб, БМТ комиссияси йиғилишида иштирок этиш имконига эга бўлди.
Маълумот учун, мазкур арбитраж суди халқаро тижорий баҳсларни ҳал этиш борасида энг нуфузли ва самарали маҳкама бўлиб, унинг ҳозирда дунё бўйича атиги 120 нафар судьяси фаолият юритади. Улардан бирига айланган Феруза Бобоқулова энди Гонконгда ишлайди ва суднинг пленар йиғилишларида иштирок этади.
Изоҳ (0)