Наманган вилоятининг Янгиқўрғон туманида 30 июнь — Ёшлар кунига бағишланган тадбирлар «Ёшлар — келажагимиз» шиори остидаги веломарофандан бошланди. Бу ҳақда туман ҳокимлиги ахборот хизмати хабар бермоқда.
Иттифоқ қишлоғидан Эски ер сув омборигача бўлган 10 километрлик масофада 70 нафардан ортиқ иштирокчи қатнашди. Улар орасида ҳатто фахрийларни ҳам кўриш мумкин эди.
Фуқароларнинг ўзини ўзи бошқариш органлари фаолиятини мувофиқлаштириш бўйича туман кенгаши томонидан шу куни эътиборга муҳтож ўнлаб ёшларнинг хонадонларига бадиий китоблар тарқатилди.
Туман марказидаги майдонда меҳнат ярмаркаси ташкил этилди. Унда Янгиқўрғондаги ўнлаб корхона ва ташкилотлар ўзларидаги бўш иш ўринлари билан қатнашди.
Туман маъмурияти биносида бўлиб ўтган «Ҳоким билан учрашув» лойиҳаси доирасида турли мусобақа ва танловларда иштирок этиб, ғолибликни қўлга киритган ёшлар фахрий ёрлиқ ва эсдалик совғалари билан тақдирланди. Тадбирда Ўзбекистонда хизмат қўрсатган артист, Республика кино арбоблари ижодий уюшмаси раиси Матёқуб Матчоновнинг иштироки ёшлар олқишига сабаб бўлди.
Байрам тадбирлари «Эко-парк» ҳудудидаги катта байрам концерти билан якунланди.
Изоҳ (0)