1 июль куни Ўзбекистон карлар жамиятининг Кар-соқовлар маданият марказида тантанали байрам тадбири уюштирилди. Байрам тадбирида бош вазир ўринбосарлари Нодир Отажонов, Азиз Абдуҳакимов, Тошкент шаҳар ҳокимлиги вакиллари, маданият ва санъат намояндалари ҳамда ОАВ ходимлари иштирок этди.
Президент Шавкат Мирзиёев 29 июнь куни Олмазор туманига ташрифи чоғида Ўзбекистон карлар жамиятининг Кар-соқовлар маданият марказини келиб кўрган ҳамда жамият аъзолари билан суҳбатлашиб, уларнинг дарду ташвишларини, соҳадаги камчиликларни сўраган эди.
Кар-соқовлар маданият маркази директори Гўзал Шодиева жамият аъзоларининг маданият, санъат, спорт ва бошқа соҳаларда эришаётган ютуқлари ҳақида сўзлаб берди. Учрашув қатнашчиларини таништирди.
Давлат раҳбари уларнинг яшаш шароитлари билан қизиқди. Шахмат бўйича икки карра жаҳон чемпиони Сирожиддин Зайниддинов, таэквондо бўйича Осиё чемпионати совриндори Даврон Хидиров ва рақс тўгараги раҳбари, халқаро танловлар ғолиби Олег Ошепковнинг уй-жойга эҳтиёжи борлигини эшитиб, уларга Тошкент шаҳридан уй ажратишга топшириқ берди. Кар-соқовлар маданият маркази аъзоларининг ижодий сафарларига қулайлик яратиш учун марказга иккита автобус совға қилинишини айтди.
Бугунги тантанали тадбирда карлар жамияти аъзоларига Президент совғалари топширилди.
Тантанали байрам дастури, файзли дастурхон атрофидаги суҳбат жамият аъзоларига катта хурсандчилик бағишлади.
Изоҳ (0)