Тошкент шаҳридаги муҳташам «Миллий» стадионида 30 июнь — Ёшлар куни муносабати билан «Ёшлар — Ўзбекистон келажаги» деб номланган байрам гала-концерти ўтказилди. Бу ҳақда ЎзА хабар бермоқда.
Тошкент шаҳар ҳокимлиги, Ўзбекистон ёшлар иттифоқи Тошкент шаҳар кенгаши ҳамда бир қатор давлат ва жамоат ташкилотлари билан ҳамкорликда ташкил этилган шодиёнага 20 мингга яқин томошабин келди.
Тадбирда Тошкент шаҳар ҳокими Жаҳонгир Ортиқхўжаев кириш сўзи билан очиб, мамлакатда ёшларнинг ижтимоий фаоллигини ошириш, уларни мустақил фикрлаши, орзу-интилишлари, қобилият ва салоҳиятини рўёбга чиқаришга қаратилаётган алоҳида эътибор юксак самаралар бераётганини таъкидлади.
Мудофаа вазирлигининг фахрий қоровули ва ҳарбий оркестрининг алоҳида мусиқий-кўргазмали чиқишлари ёшлар олқишига сазовор бўлди.
Ёш спортчиларнинг кўргазмали чиқишлари, бадиий жамоалар, эстрада хонандалари иштирокидаги концерт дастури барчада катта таассурот қолдирди.
Изоҳ (0)