Абдулазиз Комилов: Ўзбекистонга 5 ой давомида 2,2 миллион сайёҳ ташриф буюрди

28 июнь куни бошланган Олий Мажлис Сенатининг  XV ялпи мажлиси бугун, 29 июнь куни ҳам ўз ишини давом эттирмоқда, деб хабар беради «Дарё» мухбири Севара Нишонова.

Мажлиснинг бугунги кун тартибидан 11 та масала ўрин олган.

Сенаторлар дастлаб Ташқи ишлар вазирлигининг вазирлик зиммасига юкланган вазифаларни бажариш бўйича фаолияти тўғрисидаги ахборотини тинглади.

Вазирнинг қайд этишича, ўтган давр мобайнида хорижий делегацияларнинг Ўзбекистонга 572 та, Ўзбекистон делегациясининг хорижий давлатларга 163 та ташрифи амалга оширилди.

Шунингдек, Ўзбекистонга хорижий инвестицияларни жалб этиш бўйича ҳам қатор ишлар амалга оширилмоқда. Хусусан, хорижга ташрифлар ва олиб борилган музокаралар натижасида умумий қиймати 17 миллиард доллар бўлган 182 та йирик лойиҳани амалиётга татбиқ этиш бўйича келишувларга эришилди.

Хорижий ОАВларда Ўзбекистондаги  инвестиция имкониятлари тўғрисидаги 290 та материаллар чоп этилди.

Ташқи ишлар вазирлигининг саъй-ҳаракатлари натижасида Ўзбекистонга келаётган сайёҳлар оқими ҳам кўпайди. Жорий йилнинг беш ойи мобайнида Ўзбекистонга 2 203 899 нафар сайёҳ ташриф буюрди. Бу 2017 йилнинг шу даври билан солиштирилганда 93 фоизга кўп деганидир (1 138 250).

Хорижий давлатларда Ўзбекистоннинг сайёҳлик салоҳиятини акс эттирувчи 100 дан ортиқ тақдимотлар ташкил этилди. 36 та давлат ОАВда Ўзбекистон сайёҳлик салоҳияти ҳақида материаллар чоп этилди. 13 та мамлакатнинг 29 та телеканалида Ўзбекистондаги диққатга сазовор жойлар ҳақида кўрсатувлар намойиш этилди.

Вазирлик томонидан хориждаги ўзбекистонлик фуқароларнинг ҳуқуқларини ҳимоя қилиш, ватандошлар билан мунтазам мулоқот қилиш йўналишитда ҳам қатор ишларни амалга оширилди.

Муҳокама чоғида Ташқи ишлар вазирлиги олдига қўйилган вазифаларни самаралироқ бажаришга тўсқинлик қилаётган муаммолар мавжудлиги қайд этилди. Хусусан, вазирлик ва идоралар билан биргаликда Ўзбекистон товарлари экспортини амалга ошириш, инвестициялар  ва туристларни жалб қилиш масалалари юзасидан Ташқи ишлар вазирлиги ва дипломатик ваколатхоналар ҳали ҳам ўзлари билдирган таклифлар соҳага ихтисослашган идоралар ва вилоят ҳокимликлари томонидан узоқ вақт кўриб чиқилиши билан богғлиқ муаммолар юзага келмоқда.

Сенаторлар Ташқи ишлар вазирлиги фаолияти самарадорлигини янада ошириш бўйича истак ва тавсиялар билдирди.