Урганч, Хонқа ва Янгиариқ туманларидаги ижтимоий ҳимояга муҳтож аҳоли уй-жой билан таъминланди

Бу борада Хоразм вилояти ИИБ бошлиғи раҳбарлик қилувчи Урганч, Хонқа ва Янгиариқ туманларини ўз таркибига олувчи 3-секторда ҳам ижтимоий ҳимояга муҳтож аҳолини қўллаб қувватлашга қаратилган бир қатор ишлар амалга оширилди , деб «Дарё»га хабар беради Хоразм вилояти ИИБ матбуот хизмати.

Жумладан, ўтказилган сайёр ва оммавий қабулларга уй-жой ажратилиши ёки қурилишида амалий ёрдам кўрсатишни сўраб мурожаат қилган фуқароларни яшаш шароити ва даромад манбалари ўрганиб чиқилиб, ҳақиқатда уй-жойга муҳтож, жисмоний имконияти чекланган оилалар учун бепул уй-жой қуриш режалаштириб олинган.

Хайрли ишлари натижасида, Урганч туманининг «Тандирчи» маҳалласида 4 та оилага мўлжалланган хонадонлар қисқа муддатда қуриб битказилган.

2018 йил 15 июнь куни 4 та хонадон ўз эгаларига топширилган.

Хонадонларни топширишга бағишланган тантанали тадбирда Хоразм вилояти ҳокими, вилоят ИИБ бошлиғи ва бошқа масъул раҳбарлар ҳамда кенг жамоатчилик вакиллари иштирок этдилар.

Мазкур хонадонлар маҳалла фаоллари билан келишилган ҳолда, яшаш шароити ва турмуш тарзини чуқур ўрганган ҳолда танланган оилаларга топширилди.

- Мен, кўзим ожиз бўлганлиги сабабли, биринчи гуруҳ ногирониман, турмуш ўртоғим ҳам ногирон, 2 нафар фарзандларимиз бор, мана неча йилдирки, ижарада яшаб келаётган эдик, уй-жой олишга маблағимиз, қуришга имкониятимиз йўқ эди, чамаси бир ой олдин Хоразм вилояти ИИБ бошлиғи томонидан ўтказилган оммавий қабулда иштирок этиб, уй-жой олиш масаласида мурожаат этган эдим. Менинг мурожаатим вилоят ИИБ бошлиғи томонидан бунчалик тез ва тўлиқ қаноатлантирилганидан чексиз миннатдорман. Ўзимнинг жисмоний имкониятим чекланганлиги боис давлат ва жамият учун тўлиқ наф келтира олмаётганлигимдан афсусдаман, лекин фарзандларимни албатта юрт корига ярайдиган инсонлар қилиб тарбиялайман. Зеро, улар ҳам келгусида комил инсонлар бўлиб вояга етишиб, ижтимоий ҳимояга муҳтожларга ўз ёрдам қўлларини чўзишларини хоҳлайман,—дейди янги қурилган хонадонлардан бирининг эгасига айланган Ботир Камалов.

Мазкур хонадонлар кундалик турмуш тарзи учун зарур бўлган уй-рўзғор жиҳозлари билан ҳам таъминлаб берилди