Ўзбекистон Президенти соврини учун тадбиркорлар, фермерлар ва ҳунармандлар ўртасида ўтказиладиган «Ташаббус» республика кўрик-танлови бу гал тамомила янгича шаклда ва юқори савияда ўтказилади. Бу ҳақда Ўзбекистон Савдо-саноат палатасида бўлиб ўтган брифингда маълум қилинди, дея хабар беради «Халқ сўзи».
—Ўрганишларимизга қараганда танлов ғолиблигига, асосан, саноат йўналишидаги тадбиркорлар ғолиб бўлган, — дейди Савдо-саноат палатаси раиси ўринбосари Жамшид Ўроқов. — Адолат тамойилини таъминлаш мақсадида янги «Хизмат кўрсатиш соҳасида энг яхши тадбиркор» ҳамда «Энг яхши ёш тадбиркор» каби номинациялар ҳам ташкил этилиб, асосий номинациялар сони бештага етказилди.
Бу йилги танловнинг ҳудудий, яъни туман босқичига июль ойида старт берилиб, жойларда юқори савияда ташкиллаштирилади. Якуний босқич эса пойтахтдаги нуфузли кўргазмалар мажмуаларидан бирида, байрамона руҳда ўтказилиши кўзда тутилган.
Ғолибларни тантанали тақдирлаш маросими куз ойларида бўлиб ўтади. Унда барча иштирокчилар қамраб олиниб, миллий иқтисодиёт ривожи йўлидаги хизматлари муносиб эътироф этилади.
Изоҳ (0)