Бугун, 19 июнь санасида Россияда бўлиб ўтаётган Жаҳон Чемпионати доирасида 1-тур ўйинлари давом эттирилмоқда.
Куннинг дастлабки ўйини «H» гуруҳидан ўрин олган Колумбия ҳамда Осиё қитъаси вакили Япония ўртасида бўлиб ўтди. Учрашув аввалида бош ҳакам словакиялик Дамир Скомина Колумбия термаси ярим ҳимоячиси Карлос Санчесга тўпни жарима майдони ичида қўли билан ўйнагани сабаб қизил карточка кўрсатди.
Шунингдек, Давид Оспина дарвозаси томон пенальти қўйди. 32 ёшли футболчи мундиал тарихида энг тез четлатилган иккинчи футболчи бўлди. У қизил карточка олган вақтда 2-дақиқанинг 56-сонияси ўтиб бораётганди.
Пенальтини эса Шинжи Кагава голга айлантирди. 39-дақиқага келиб японлар дарвозасига жарим тўпи белгиланди. Хуан Кинтеронинг зарбасини қайтаришда японияликлар дарвозабони Эйжи Кавашима хатога йўл қўйиши оқибатида биринчи бўлим 1:1 ҳисобида якунланди.
Иккинчи бўлимнинг 73-дақиқаси Южи Осака бурчакдан ошириб берилган тўпни Оспина дарвозасига йўллаб, жамоасининг ғалабасини таъминлади.
Бироздан сўнг гуруҳнинг иккинчи учрашуви Польша—Сенегал ўртасида бўлиб ўтади.
Жаҳон Чемпионати
1-тур беллашуви, «H» гуруҳи
19 июнь, сешанба
Колумбия—Япония 1:2
Голлар: 0:1 — 6, пенальти Кагава, 1:1 — 39 Кинтеро, 1:2 — 73 Осака.Четлатиш: Карлос Саншес (3).
Изоҳ (0)