ЖЧ—2018. Россиядаги Жаҳон Чемпионатида илк қизил карточкани олган колумбиялик футболчи мундиал тарихига кирди

Айни дамда Россияда ўтаётган Жаҳон Чемпионати «H» гуруҳи 1-тур доирасида Колумбия ва Япония терма жамоалари беллашмоқда. Учрашув аввалида колумбияликлар ярим ҳимоячиси Карлос Санчес қизил карточка олиб майдонни тарк этди.

Баҳс бош ҳаками словакиялик Дамир Скомина Санчесга тўпни жарима майдони ичида қўли билан ўйнагани сабаб қизил карточка кўрсатди. Шунингдек, Давид Оспина дарвозаси томон пенальти қўйди.

32 ёшли футболчи мундиал тарихида энг тез четлатилган иккинчи футболчи бўлди. У қизил карточка олган вақтда 2-дақиқанинг 56-сонияси ўтиб бораётганди.

Мундиал тарихидаги энг тез четлатиш эса 1986 йилда кўрсатилган. Ўшанда уругвайлик футболчи Хосе Альберто Батиста Шотландияга қарши баҳсда 54-сониядаёқ қизил олган.

Таъкидлаш жоиз, Карлос Санчес Россиядаги мундианинг илк қизил карточкасини олди. Шунингдек, у Жаҳон Чемпионатлари тарихида колумбиялик футболчига кўрсатилган илк қизил карточка соҳиби сифатида ҳам тарихга кирди.

Айни вақтда учрашув 1:1 ҳисобида давом этмоқда. «Дарё» эса мазкур ўйиндан матнли онлайн трансляция олиб бормоқда.