Мусулмонлар идораси тасарруфидаги олий ва ўрта махсус ислом билим юртларига 2018—2019-ўқув йили учун қабул квоталари эълон қилинди. Бу ҳақда Мусулмонлар идораси матбуот хизмати хабар бермоқда.
Ўрта махсус ислом билим юртларига 15 июндан 5 июлгача абитуриентлар ҳужжат топшириши мумкин. Умумий ўрта таълимни (11-синф базасида) тамомлаганлик тўғрисидаги шаҳодатнома (аттестат) ёки академик лицей, касб-ҳунар коллежи дипломига эга бўлганлар танлов асосида қабул қилинади.
Кўкалдош (Тошкент), Хожа Бухорий (Қашқадарё), Саййид Муҳйиддин махдум (Андижон), Ҳидоя (Наманган), Мир Араб (Бухоро), Фахриддин ар-Розий (Урганч), Муҳаммад ал-Беруний (Нукус) ўрта махсус ислом таълим муассасалари ўғил болалар учун 30 та ўрин ажратган. Хадичаи Кубро (Тошкент) ҳамда Жўйбори Калон (Бухоро) аёл-қизлар ўрта махсус ислом таълим муассасалари 20 нафар аёл-қизни қабул қилишини эълон қилган.
Имом Бухорий номидаги Тошкент ислом институти ва Мир Араб олий мадрасасига 15 июндан 10 июлгача ҳужжат топшириш мумкин. Уларга Мусулмонлар идораси тасарруфидаги ўрта махсус ислом билим юртини битирганлиги ҳақида дипломга эга бўлганлар танлов асосида қабул қилинади.
Тошкент ислом институти 42 та ўринни ўғил болалар ва 8 та ўринни қизлар учун ажратган. Мир Араб олий мадрасаси (Бухоро) 25 нафар ўғил бола учун квота эълон қилган.
Шунингдек, Тошкент ислом институтининг махсус сиртқи бўлимига 15 июндан 30 июнгача ҳужжат топширилади. Сиртқи бўлимга ўрта махсус ислом билим юртларини тамомлаганлиги тўғрисидаги ҳужжатга (диплом) эга, Мусулмонлар идораси тизимида 5 йил стажи бор фуқаролар қабул қилинади. Maxсус сиртқи бўлимнинг қабул квоталари тўғрисида ҳозирча маълумот тақдим қилинмаган.
Изоҳ (0)