Бир қатор муваффақиятли компаниялар таъсисчиси Ҳикмат Абдураҳмонов ифтордан олдин «Мени бир чимдиб кўринг, туш эмасми бу?! Биз ростдан ҳам бош вазир ўринбосари билан шунчалар осон мулоқот қиламизми?»,—дейди.
Бу туш эмас эди. Бир дастурхон атрофида галстуксиз ва ҳатто пиджакларсиз таниқли бизнесмен ва Тошкент шаҳар ҳокимияти Жамоатчилик кенгаши раиси Ҳикмат Абдураҳмонов, «Korzinka.uz» тармоғи раҳбари Зафар Ҳошимов, девелопер Мурод Назаров, бизнес-консултант Баҳодир Фозилхўжаев, Тошкент давлат иқтисодиёт университети проректори Дурбек Аҳмедов, Huawei компанияси департаментининг директори Даврон Азизов, мазкур сатрлар муаллифи Бахтиёр Насимов ҳамда бош вазир ўринбосари Жамшид Қўчқоров, Марказий банк раисининг биринчи ўринбосари Темур Ишметов, иқтисодиёт вазирининг биринчи ўринбосари Мубин Мирзаев, молия вазирининг биринчи ўринбосари Аҳадбек Хайдаров тўпланди.
Тан олишим керак, бу кутилмаган, бироқ мантиқан тўғри учрашув бўлди.
Кутилмаган жиҳати шундаки, мен бош вазири ўринбосари каби давлат амалдорлари иштирок этган норасмий ифторда биринчи бор таклиф этилганим.
Мантиқан тўғрилиги эса, Ўзбекистон Президенти Шавкат Мирзиёевнинг сиёсий жасорати имконсиз бўлиб туюлган кўплаб нарсаларни ҳақиқатга айлантирганида. Эркин конвертация, қўшнилар билан чегарани очиш. Мансабида абадий қоладигандек туюлган сиёсий ва иқтисодий амалдорларнинг катта саҳнадан кетиши.
Ўтган йили халқ билан мулоқот орқали эълон қилинган очиқлик — бир йиллик кампания эмас эди, у аста-секин жамиятнинг ажралмас қисмига айланди.
Кеча бош вазир ўринбосари, молия вазири Жамшид Қўчқоров билан бизнесменларнинг норасмий учрашуви бўлиб ўтди.
Қўчқоров макроиқтисодий таҳлил ва прогнозлаштириш, молиявий ва банк тизимини ислоҳ қилиш, хусусий тадбиркорлик ва кичик бизнесни ривожлантириш комплексини бошқаради.
Барчаси ҳақида гаплашилди. Аниқроғи, бу уч ярим соат давом этган очиқ ва хотиржам суҳбат эди.
Ифторликда ўз сўзини билдирган инсонлар ҳамда учрашув мавзуси ва натижаси ҳақида ёзишдан олдин, бир неча соат кейинроқ миямга келган фикр билан бўлишсам.
Бўлиб ўтган суҳбат, мунозара ва муҳокамалардан кейин бош вазир ўринбосари ҳамда учта биринчи ўринбосарларга — молия вазири, иқтисодиёт вазири ва Марказий банк раиси ўринбосарларига қараб Ўзбекистон Президенти ҳақиқатда ислоҳотчилар гуруҳига эга эканлигига амин бўлдим. Улар мамлакатнинг ижтимоий-иқтисодий аҳволига бутунлай ҳушёр, оқилона ва амалий тарзда ёндаша олади.
Учрашувда иштирок этган амалдорлар реал ислоҳотлар ва ғояларни қадрлаши, божхона ва солиқ қонунчилигини тубдан ўзгартириш лозимлигини, давлатнинг хўжалик юрутувчи хусусий банклар, ташкилот ва бизнесменлар ишига аралашмаслиги аҳамиятини тушуниб турарди.
Тадбиркорликни ривожлантириш масаласида ютуқларга эришиш учун бир қатор макро ва микро муаммоларни ҳал этиш зарур. Баъзан ҳатто нимадан бошлаш керак деб миянг ачиб кетади. Морган Фримен ва Жек Николсон иштирокидаги The Bucket List фильмини кўрганмисизлар? Мен ҳам 2020 йилнинг 1 январига қадар ҳал этилиши лозим бўлган 20 та энг муҳим муаммонинг рўйхатини тузишни таклиф этаман. Бироқ, бизда лапанглаб юриш учун бунча вақт йўқ, деб ўйлайман.Келинглар, 2019 йилнинг 1 январига қадар амалга ошириш лозим бўлган 19 та энг оғриқли ва муҳим масалалар рўйхатини тузамиз. Ўртага ташлаймиз.
Ҳозирнинг ўзида ўнлаб муаммоларни келтириб ўтдик: ерга хусусий эгалик қилиш; солиқ ва божхона ислоҳоти; давлат-хусусий сектор ҳамкорлиги; иқтисодиётда давлатнинг ролини камайтириш; бизнес-ассоциацияларни яратиш; савдо-сотиқ; банк тизими; кредитлар ва нақд пуллар; ишчиларни «соя»дан чиқариш ва шу турдаги бошқа масалалар.
Бир ой вақтимиз кетсада, биргаликда 19 та оғриқли масалани аниқлаб олсак, якдил фикрга келсак ва устувор вазифаларни ҳал этиш бўйича ҳаракатлар режасини тузиб олсак. Шунда бир мақсаддан бошқаси томон ҳаракатланган бўламиз.
Жамшид Қўчқоров, бош вазир ўринбосари
Мен учун асосий мавзулардан бири янги солиқ ислоҳотининг муҳокамаси бўлди. Суҳбатдошларимиз таклиф этилган чора-тадбирларни тўлиқ ва чуқур тушунганлиги, паст ставкаларга қарамай давлат бюджетини сақлаб қолиш борасида хавотири кўриниб турсада, уни қўллаб-қувватлашга тайёр эканликлари маълум бўлди.Ҳикмат Абдураҳмонов:Ушбу хавотирни тўлиқ тушунган ҳолда, айрим ўтиш босқичларида, бозорнинг асосий қисмини соядан чиқиши солиққа тортиладиган базанинг тез ўсишига, бу эса ўз навбатида ставкаларнинг пасайиши оқибатида юзага келган йўқотишларни қоплаш имконини бериши борасидаги фикримни тушунтиришга ҳаракат қилдим.
Зафар Ҳошимов, «Korzinka.uz» тармоғи раҳбари
—Ярим йиллар олдин Жамшид Анварович билан Халқаро пресс клубда суҳбатлашиш ва унинг теран фикрларини баҳолаш имкониятига эга бўлганман. Аммо тан олиб айтаманки, ҳокимиятнинг бизнесдан йироқ бўлиши анъанага айланган мамлакатимизда бунинг иложи борлигини ўйламаган эдим. Учрашув шу қадар дўстона ва норасмий муҳитда бўлиб ўтдики, ҳатто вақт қандай ўтганини сезмай ҳам қолибман.
Баҳодир Фозилхўжаев:
— Очиғи, биз ҳаммамиз (бизнес ҳамжамият вакиллари) фақат тасанно дедик. Айтишим мумкин-ки, баъзи бир ҳолатлар бўйича ҳали кўп гаплашиб, бир-биримизни тушунишимиз кераклигини, баъзи бирлари бўйича эса давлат тизимидаги тайёрланаётган лойиҳалар бизни кутганимиздан ҳам ортиқ эканлигини англаб етдик. Албатта, бу бизни қувонтирди.
Якунда Ҳикмат Абдураҳмонов айтганидек: «Мамлакатда тадбиркорлик ва ҳукумат ўртасидаги ўзаро муносабатларнинг сифатли янги даражаси — айнан ушбу учрашувдан бошланади».
Бахтиёр Насимов, «Дарё» шарҳловчиси
Изоҳ (0)