Наманганда Бобур номли маданият ва истироҳат боғида ўтказилган 58-анъанавий «Гул байрами» ғолиблари ва совриндорларини тақдирлаш маросими бўлиб ўтди. Бу ҳақда «Дарё» мухбири хабар бермоқда.
Бу йилги байрам илк бор бир ҳафта давом этди. Унда нафақат наманганликлар ва вилоят меҳмонлари, балки 10 дан ортиқ чет давлатдан келган мартабали вакиллар ва сайёҳлар ҳам иштирок этди.
«Гул байрами»нинг олий ўрин соҳиблари учун иккита Spark ажратилди. Автомобильлар гулчи Мирзоҳид Холмирзаев ҳамда «Наманган ҳудудий электр тармоқлари корхонаси» жамоасига насиб этди.
Биринчи ўринни эгаллаган гулчи Азизбек Мамажонов ва вилоят касаба уюшмалари ташкилотлари бирлашмаси, иккинчи ўринда қайд этилган Садриддин Қодиров ва Наманган шаҳар халқ таълими бўлими, учинчи ўринни банд қилган Жўрахон Мўминов ва Наманган муҳандислик-қурилиш институти жамоалари диплом ва эсдалик совғалари билан тақдирланди.
Тақдирлаш маросимида Ўзбекистон халқ артистлари Абдуҳошим Исмоилов ва Зулайҳо Бойхонова, Ўзбекистонда хизмат кўрсатган артистлар Меҳри Абдуллаева, Яҳёбек Мўминов, Самандар Хамроқулов, «Ниҳол» давлат мукофоти совриндорлари Малика Эгамбердиева, Гуласал Абдуллаева, хонандалар Отабек Муҳаммадзоҳид, Муниса Ризаева, Қиличбек Мадалиев куй-қўшиқлари билан иштирок этди.
Бобур номли боғдаги гул сайллари давом этмоқда.
Изоҳ (0)