Ҳиндистон жанубида Нипах вирусидан ўлганлар сони 16 тага етди

Ҳиндистон жанубида Нипах вируси қурбонлари сони 16 тага етди. Бу ҳақда Hindustan Times газетасига таяниб, «РИА Новости» хабар бермоқда.

Маълумотларга қараганда, Ҳиндистон жанубидаги Керала штатида 56 ва 28 ёшдаги икки киши Нипах вирусини юқтириб олган. Қурбонларнинг иккиси ҳам Керала штати Кожикода шаҳридаги шифохоналардан бирига олиб келинган.  Орадан бироз вақт ўтгач, уларнинг аҳволи яхшиланишни бошлаган. Бироқ кейинроқ беморларнинг ҳолати яна оғирлашиб, шифокорлар уларнинг ҳаётини қутқариб қола олмаган.

24 май, пайшанба куни Ҳиндистон Соғлиқни сақлаш вазирлиги вакили Прити Судан Нипах вирусининг Керала штатида қайд этилганини расман эълон қилди. Прити Судан инфекция маҳаллий характерга эга экани ва шифокорлар унинг ёйилишини тўхтатишга муваффақ бўлганини маълум қилган. Бу вақтда 11 кишининг ўлими расман тасдиқланган эди. Улар орасида беморларга қараган ҳамшира ҳам бўлган. Бир неча кундан кейин Керала штатида вирус билан зарарланишнинг янги ҳолати қайд этилиб, натижада ҳафта ичида қурбонлар сони яна бештага ортган.

Бутунжаҳон соғлиқни сақлаш ташкилоти берган маълумотларга қараганда, Нипах вируси 1998 йилда Малайзиядаги Кампунг Сунгай Нипах қишлоғида аниқланган. Ўшанда вирус ташувчилари чўчқалар бўлган. 2004 йили Бангладешда оммавий зарарланиш ҳолати кузатилган. Вирус палма шарбати орқали тарқалган. Кейинчалик Ҳиндистондаги касалхоналардан бирида вируснинг одамдан одамга ўтиши қайд қилинган.

Бугунги кунда на одамлар, на ҳайвонлар учун вирусдан вакцина ишлаб чиқилмаган. Вирус билан зарарланиш ҳолатларининг 70 фоизида касаллик ўлим билан якун топади.

Аввалроқ, Ҳиндистонда одамнинг ўлимига олиб келадиган даражада хавфли инфекция қайд этилгани хабар қилинган эди.