Покистонда иссиқ об-ҳаво туфайли ўнлаб кишилар ҳалок бўлди

Покистоннинг энг йирик шаҳарларидан бири Карачида иссиқ об-ҳаво туфайли 65 киши ҳалок бўлди, деб хабар беради «Корреспондент.net».

Шаҳарда Цельсий шкаласи бўйича 44 даража иссиқ кузатилган.

«Сўнгги уч кун ичида 65 киши вафот этди. Уларнинг жасади ўликхонада. Шифокорларнинг айтишича, фуқаролар иссиқ об-ҳаво туфайли юз берган инсульт оқибатида вафот этган», — дейди Эдхи ижтимоий жамғармаси бошлиғи Файсал Эдхи.

Унинг сўзларига кўра, ўлим ҳолатининг аксарияти Карачининг қашшоқ туманларида кузатилган.

Қайд этилишича, иссиқ об-ҳаво аксарият мусулмонлар рўза тутадиган Рамазон ойида кузатилмоқда.

2015 йилда ҳам мамлакатда шундай ҳолат кузатилган. Ўшанда 1300 дан ортиқ киши ҳалок бўлган.