Фарғона шаҳрида ногиронлиги бор шахслар ва эҳтиёжманд оилаларга янги уй-жойлар топширилди. Бу ҳақда «Дарё» мухбири Азизжон Эрматов хабар берди.
Ногиронлиги бўлган 10 нафар фуқарога Фарғона шаҳрининг Жомий маҳалласида жойлашган кўп қаватли уй-жойлардан хонадонлар бепул топширилди.
Ҳар бири 36 хонадонли бўлган иккита 3 қаватли уйнинг қурилиш-таъмирлаш ишларига 6 миллиард 200 миллион сўм маблағ сарфланди. Қурилиш 6 ой давом этиб, «Глобал водий бизнес» МЧЖ томонидан олиб борилган.
Яна 9 та хонадон ногиронлиги бўлган шахсларга бепул берилиши режалаштирилган.
Уйлар ёнида «Фар Моҳинур текстил» МЧЖ фаолияти ташкил этилиб, 35 та янги иш ўрни яратилди. Янги корхонага мазкур уйларда яшовчи кам таъминланган оила аъзолари, ногиронлиги бўлган шахслар ишга олинади.
«Янги уч хонали уй калитини қабул қилиб олдим. Шу кунгача 3 нафар ногирон фарзандим билан ижарада яшар эдим. Президент совғаси сифатида янги уй, мебел ва ошхона жиҳозларига эга бўлганимдан кўз ёшларимни яшира олмадим», – дейди янги хонадон эгаларидан бири Мавлуда Ўрмонова.
Изоҳ (0)