Ўзбекистонда инновацион технологиялар жорий этилаётгани, мобил ва оптик толали тармоқлар кенгайтирилаётганига қарамай, алоқа соҳасидаги хизматлар бўйича шикоятлар сони ортмоқда. Бу ҳақда ЎзА хабар берди.
Шу йилнинг биринчи чорагида бундай мурожаатлар сони 1,5 мингдан ошди. Статистик таҳлиллар аксарият мурожаатлар интернет-хизматлар, телефон алоқаси, мобил алоқа ва телерадиоэшиттиришлар билан боғлиқ эканини кўрсатди.
Шу мақсадда Вазирлар Маҳкамасининг «Алоқа, ахборотлаштириш ва телекоммуникация хизматлари сифатини янада яхшилашга доир чора-тадбирлар тўғрисида»ги қарори қабул қилинди. Ушбу қарорга мувофиқ, ҳисоб-китоб, қонунчилик ва бошқа меъёрий ҳужжатлар талаблари, давлат стандартлари ва алоқа, ахборотлаштириш, телекоммуникация технологиялари соҳасида кўрсатилаётган хизматларига риоя қилмаслик учун молиявий санкциялар (жарима) қўллаш тартиби тўғрисидаги низомни ишлаб чиқиш ва тасдиқлаш вазифаси юклатилди.
Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси «Unicon.uz» давлат унитар корхонаси билан ҳамкорликда мазкур ҳужжат лойиҳасини ишлаб чиқди. Бу телекоммуникация тармоқлари кўрсатаётган хизматлар бўйича меъёрий ҳужжатлар талабларини бузганлик учун давлат назоратини амалга ошириш ва молиявий санкциялар (жарима) қўллаш тизимини такомиллаштириш имконини беради.
Ушбу ҳужжат телекоммуникация тармоқларининг барқарор, узлуксиз ва ишончли ишлаши, истеъмолчиларнинг ўз вақтида ва сифатли алоқа, ахборотлаштириш ва телекоммуникация технологиялари хизматларига доир ҳуқуқлари ҳимоясини таъминлашга хизмат қилади.
Бу ҳақда Ахборот технологиялари ва коммуникацияларини ривожлантириш вазирлигининг алоқа тарихи музейида бўлиб ўтган давра суҳбати айтилди.
Шунингдек, давра суҳбатида операторларга кун тартибига телекоммуникация бозоридаги мавжуд муаммоларни киритиш, мобил операторлар ва интернет-провайдерлар фаолиятидаги бюрократик тўсиқлар ҳақида сўзлаб бериш имкони тақдим этилди.
Изоҳ (0)