Ўзбекистон интернет тезлиги энг ёмон бўлган мамлакатлар «бешлиги»ни тарк этди

Speedtest Global Index маълумотларига кўра, Ўзбекистондаги интернет тезлиги апрель ойи ҳисоб-китобларига кўра бироз тезлашган, деб хабар беради Spot.

Ирландиянинг Оокла компаниясига қарашли Speedtest.net интернет-сервиси ҳар ойлик  Speedtest Global Index рейтингини эълон қилди. Унда 2018 йил апрель ойи ҳисоб-китобларига кўра, бутун дунёдаги симли ва симсиз интернет тезликлари ҳақида маълумотлар келтириб ўтилган.

Ўзбекистонда мобил интернет тезлиги тўрт поғона юқорилаган ва ҳозирда рўйхатдан ўрин олган 126 давлат орасидан 115 ўринни эгаллаб турибди (8,93 Мбит/с).

Симли интернет тезлиги бўйича (6,78 Мбит/с) эса бир поғона кўтарилган ва 128 ўринни банд этган (135 давлат орасидан).

2017 йил охиридаги ҳисоб-китобларга кўра, Ўзбекистон интернет тезлиги жуда ёмон бўлган давлатлар бешталигига кирган эди. Ўшанда мобил интернет тезлиги 6,47 Мбит/сонияни, симли интернет эса 5,81 Мбит/сонияни ташкил этган.

Мобил интернет рейтинги бўйича етакчилик ҳамон Исландияда (65,90 Мбит/с), симли интернет бўйича эса — Сингапур биринчиликда (174,94 Мбит/с).