Сурхондарё вилояти ички ишлар идораси ходимлари Денов туманида тезкор тадбир ўтказганида Феруз кўчасида яшовчи Толмас Қайтмасовнинг (исм-шарифлар шартли) уйини ҳам бирров кўздан кечирди. Буни қарангки, уй томорқасида марихуана парвариш қилинаётган экан, дея хабар беради ЎзА.
Шундан сўнг томорқада бўй кўрсатиб турган 71 туп гиёҳвандлик ўсимлиги холислар иштирокида ҳужжатлаштирилиб, Т. Қайтмасовга нисбатан ЖКнинг тегишли моддаси билан жиноят иши қўзғатилди.
Унинг 29 ёшли ўғли Олмос Қайтмасовга ўтган йили фирибгарлик жинояти учун ахлоқ тузатиш» жазоси тайинланиб, профилактик ҳисобга олинган эди. Жорий йилнинг февраль ойида у 10 килограмм гашиш ва 3,6 килограмм марихуана гиёҳвандлик моддаси билан қўлга тушди.
Унга нисбатан ЖКнинг 273-моддаси 5-қисми билан жиноят иши қўзғатилди. Толмас Қайтмасов ўғлининг бундай қилмишларидан тўғри хулоса чиқармаган шекилли, эндиликда ўзи ҳам жирканч жиноят кўчасига кириб қолди.
Айни пайтда 62 ёшдаги бу шахснинг мазкур ҳаракати юзасидан тергов-суриштирув ишлари олиб борилмоқда.
Изоҳ (0)