Илон Маск томонидан асос солинган Tesla электрокарлар ишлаб чиқарувчи компанияси бир дақиқада 6,5 минг доллар сарф қилиши маълум бўлди, деб ёзади Bloomberg.
Компания 2017 йилни 3,4 миллиард доллар нақд пул ва 9,4 миллиард доллар қарз билан якунлади. Агар автомобиль ишлаб чиқарувчи компания шундай суръатда пул сарф қилишда давом этса, 2018 йилда қўшимча молиялаштиришсиз нақд пулсиз қолади.
Tesla яратилганидан кейинги етти йил давомида (2003 йилда асос солинган) ўз маблағлари ва венчур фондлари маблағлари ҳисобига яшаган, молиялаштиришнинг катта қисми Маскнинг ҳиссасига тўғри келган. Шу билан бирга, Bloomberg ёзишича, компания АҚШ ҳукумати томонидан ўзгача қўллаб-қувватланади (ҳеч бир бошқа автомобиль ишлаб чиқарувчи бундай кўмакка эга эмас).
Масалан, 2010 йилда Tesla энергетика вазирлигидан 465 миллион доллар кредит олган, уни 2013 йилда ёпган.
Шунингдек, 2010 йилда Tesla ходимлари сони 899 нафар бўлган бўлса, 2018 йил бошига келиб, улар 40 минг кишига етган. Ишчилар ёлланишининг давом этиши пул сарфини янада кўпайтиради. 2014 йилдан 2017 йилгача Tesla ходимлари сони уч баравар ошган, аммо компанияга бир киши томонидан келтириладиган даромад ўсмаган.
Бундан ташқари, компания Tesla Model 3 автомобилини ишлаб чиқариш бўйича ўз режаларини бажармаган. Bloomberg фикрича, буларнинг барчаси компания тақдири ҳақидаги жиддий хавотирга сабаб бўлмоқда. Tesla навбатдаги молиявий ҳисоботини 2 май куни тақдим этади.
Изоҳ (0)