Миллий матбуот марказида 25 апрель куни Ўзбекистон Автомобиль йўллари давлат қўмитаси томонидан оммавий ахборот воситалари вакиллари учун «Автомобиль йўллари қуриш ишлари сифатини ошириш, йўллардан фойдаланиш жараёнига комплекс ёндашув» мавзуида матбуот анжумани ўтказилди, дея хабар бермоқда давлат қўмитаси матбуот хизмати.
Анжуманда қайд этилганидек, Ўзбекистон Президентининг 2017 йилнинг 11-сентябрдаги «Автомобиль йўлларининг архитектура-ландшафт қурилиши ва кўкаламзорлаштириш тизимини такомиллаштириш чора-тадбирлари тўғрисида»ги қарори ижроси юзасидан «Ўзйўлкўкаламзорлаштириш» унитар корхонаси ва унинг вилоятлардаги ҳудудий «Йўлкўкалам» унитар корхоналари ташкил этилган эди.
Президент қарорида 2018 йил учун республика умумфойдаланиш автомобиль йўллари бўйларидаги чегара ҳудудларига 288 минг дона ҳар хил турдаги манзарали, бутасимон, игна баргли, баланд ва ўрта бўйли дарахт кўчатлари экилиши белгилаб қўйилган эди.
Қўмита вакилларининг маълум қилишича, 2018 йилнинг биринчи чораги давомида Қорақалпоғистон Республикаси ва барча вилоятлардаги мавжуд умумфойдаланиш автомобиль йўллари чегарасига туташ йўл бўйи ҳудудларида 505,1 километр узунликда кўкаламзорлаштириш ва ободонлаштириш ишлари олиб борилди ва 230 минг донага яқин ниҳоллар экилди.
Изоҳ (0)