Ўзбекистон Республикаси норматив-ҳуқуқий ҳужжатларининг муҳокамаси порталига вилоят ҳокимликларининг шаҳар йўловчилар транспорти йўловчилар ташиш ҳақининг янги тарифини белгилаш тўғрисидаги қарорлари лойиҳалари жойлаштирилди, деб хабар беради Sputnik.
Қорақалпоғистон Вазирлар Кенгаши, Қашқадарё, Андижон ва Наманган вилоятлари ҳокимликларининг қарорлари лойиҳаларида билдирилишича, йўлкира ҳақларининг оширилишига Молия вазирлигининг 2018 йил 12 апрелдаги хати асос қилиб олинган.
Наманган вилояти ҳокимлигининг қарори лойиҳасига кўра, Наманган шаҳрида 2018 йил 1 майдан бошлаб, автобус йўловчилар ташиш транспортида йўловчиларни бир маротаба ташиш хизмати (йўлкира ҳақи)нинг янги тариф даражаси минг сўм этиб белгиланади.
Қарши шаҳрида йўловчилар транспортида йўловчилар ташиш хизматларининг чекланган тарифи «Damas» русумли автотранспорт воситалари учун йўлкира ҳақи бир йўловчи учун бир ярим минг сўм, «Isuzu» автобусларига минг сўм этиб белгиланиши кўзда тутилган.Андижон шаҳар ҳудудида фаолият кўрсатаётган автобус йўналишлари учун йўл кира нархлари минг сўм этиб белгиланиши кўзда тутилмоқда. Андижон шаҳар ҳудудида фаолият кўрсатаётган йўналишли такси йўналишлари учун йўл кира нархлари 5 километргача бўлган масофа учун минг сўм, 5 километрдан юқори бўлган масофа учун 1500 сўм этиб белгиланади.
Қорақалпоғистон Республикасида шаҳар йўловчилар транспортида йўловчилар ташиш хизмати бир марталик автобусда йўловчиларни ташиш хизмати тарифи 900 сўм ва йўналишли таксида йўловчиларни ташиш хизмати тарифи 1000 сўм миқдорида белгиланади.
Ушбу қарорлар лойиҳалари муҳокамаси якунига етишига оз муддат қолган бўлса-да, муҳокамаларда саноқли фуқаролар иштирок этган.
Бугунги кунда Ўзбекистонда 6 мингдан зиёд автомобиль транспорти хизмати кўрсатувчилар фаолият юритмоқда. Уларнинг автопаркларида 115 минг лицензияланган автотранспорт воситалари бор, жумладан 7801 автобус, 3531 микроавтобус, 36,6 минг «Damas» ва 22,7 мингдан ортиқ такси автомобиллари мавжуд. Йўловчи ташишга ихтисослашган корхоналарнинг 20 фоизи Тошкент шаҳрида фаолият юритади.
Экспертлар фикрига кўра, мамлакатда ҳар 10 минг кишига 2,3 дона лицензияланган автобус, 1 микроавтобус ва 12 та «Damas» тўғри келади. Бошқа мамлакатлар билан солиштирганда бу жуда паст кўрсатгич ҳисобланади. Масалан, Россияда ҳар 10 минг аҳоли сонига 11,7 та автобус тўғри келади.
Республикада 2021 йилга қадар босқичма-босқич равишда 2375 та янги автобус ва 5700 та микроавтобуслар сотиб олиш режалаштирилмоқда. Уларнинг аксарияти паст полли, кўп йўловчи сиғдира оладиган ва сиқилган газда ишлайдиган автобуслар бўлади.
Йўловчи транспорти инфрақурилмасини қайта тиклаш мақсадида 32 та автовокзалларни таъмирлаш, 52 та янги автовокзал ва автостанция қуриш режалаштирилган. Шунингдек ушбу объектлар ҳудудида хавфсизлик чораларини ошириш режалаштирилган.
Изоҳ (0)