O‘zbekiston Tashqi savdo vaziri Jamshid Xo‘jayev boshchiligidagi delegatsiyaning Pokistonga tashrifi yakunlandi. Bu haqda vazirlik matbuot xizmati xabar berdi.
Safar chog‘ida qishloq xo‘jaligi va oziq-ovqat xavfsizligi, moliya va iqtisodiy aloqalar, tashqi ishlar, tijorat va to‘qimachilik sanoati vazirliklarida muzokaralar o‘tkazilib, turli sohalarda kelishuv va bitimlar imzolandi. Islomobod shahrida O‘zbekiston — Pokiston ishbilarmonlari kengashi vakolatxonasining rasmiy ochilish marosimi bo‘lib o‘tdi. Ravalpindi Savdo-sanoat palatasi hamda Pokiston — O‘zbekiston savdo va madaniyat markazi bilan hamkorlika ikkita biznes-forum o‘tkazildi. Mazkur tadbirlarda Pokistonning 170 dan ortiq kompaniyasi qatnashdi.
“O‘zbekistonda ishlab chiqarilgan texnika Yevropadagi muqobillaridan qolishmasligi barobarida narxi ham qulay. Bugungi kunda Pokistonning birgina traktorlarga bo‘lgan ehtiyoji yiliga 20 ming donani tashkil etadi. Biz o‘zbek texnikalarini olib kelish va Pokiston hududida yig‘ishni yo‘lga qo‘yishdan manfaatdormiz”, — dedi Pokiston qishloq xo‘jaligi va oziq-ovqat xavfsizligi vaziri S. Bosan.
O‘tkazilgan muzokaralar yakunida farmatsevtika, charm mahsulotlari ishlab chiqarish va turizm sohasida umumiy qiymati 35,5 million dollarga teng investitsiya loyihalarini amalga oshirish bo‘yicha bitimlar imzolandi. Shuningdek, Pokistonga dukkakli va quritilgan qishloq xo‘jaligi mahsulotlari, to‘qimachilik, charm va neft-kimyo mahsulotlarini yetkazib berish bo‘yicha 8,7 million dollarlik kelishuvlarga erishildi.
Izoh (0)