Путин Испанияда суд қилинган «рус мафияси» фаолиятига алоқадор бўлиши мумкин

Россия президенти Испанияда суд қилинган «рус мафияси» фаолиятига алоқадор бўлиши мумкин, деб ёзади Tengrinews.

Испания миллий суд палатасида 19 февраль куни салкам 10 йилдан буён тергов қилинаётган россиялик фуқароларнинг Испанияда «пул ювиш»ига алоқадор жараён — «рус мафиясининг иши»ни кўриб чиқиш бошланганди.

18 нафар судланувчига прокуратура айблов эълон қилган. Судланувчилар орасида Россия Давлат думаси депутати Владислав Резник ҳам бор. Прокуратуранинг айблов хулосасида 27 нафар одамнинг фамилияси келтирилган.

Прокуратуранинг ҳисоблашича, 1996 йилда Россия фуқаролари Испанияда кўчмас мулк сотиб олиб «пул ювиш» схемасини яратган.

Суд иши чоғида асосий гумондор Геннадий Петровнинг телефон суҳбатлари тақдим этилди, уларга қараганда, «рус мафияси» аъзоларига муаммоларни ҳал қилишда нафақат мансабдорлар ва ички ишлар органлари ходимлари, балки шахсан Путин ҳам ёрдам берган.

Аудиоёзувларда Россия президентининг исм-шарифи тўғридан-тўғри тилга олинмаган, аммо испаниялик терговчилар фикрича, суҳбат иштирокчилари баъзи шартли иборалари билан айнан Путинни назарда тутган.

Шов-шувли иш бўйича ҳукм чиқаришга бир неча ой вақт кетиши мумкин. Баъзи маълумотларга кўра, суд иш бўйича ҳукмни июнда ўқиб эшиттиради.