Термиз шаҳрида ахборот-кутубхона ресурслари бўйича халқаро конференция бўлиб ўтмоқда

Термиз шаҳрида «Central Аsia 2018. Фан, таълим, маданият ва бизнесда интернет ва ахборот-кутубхона ресурслари ўрни» мавзусида ўтказилаётган XII халқаро конференцияси давом этмоқда, деб ёзади ЎзА.

Анжуман доирасида Термиз шаҳридаги Ёшлар марказида Ўзбекистондаги нашриётлар томонидан янги чоп этилган китоб ва альбомлар, журнал ва бошқа матбаа маҳсулотлари кўргазмаси ташкил этилиб, болалар китоблари, энциклопедия ва луғатлар, бадиий ва илмий-оммабоп адабиётларга кенг ўрин ажратилди. Соҳани ривожлантиришга салмоқли ҳисса қўшаётган бир гуруҳ мутахассисларга фахрий ёрлиқ ва қимматбаҳо совғалар тантанали топширилди.

Вилоят марказида янгидан қурилиб, шу йил фойдаланишга топширилган Адиб Собир Термизий номидаги Сурхондарё вилояти ахборот-кутубхона маркази бунга яққол мисолдир.

«Миллий ва замонавий архитектура ечимлари асосида барпо этилган янги маърифат масканимиз халқаро стандартларга мос жиҳозланган. 225 мингга яқин китоб ва 5 мингга яқин электрон китоб фондига эга янги марказда Book-kafe ва ‘Китоб олами’ савдо дўкони, Wi-Fi ҳудуд мавжуд. Муҳташам масканда бир йилда юз мингдан ортиқ китобхоннинг эҳтиёжини қондириш имконияти яратилган. Бундай замонавий шароитлар китоб мутолаасига қизиқиш ва интилишни янада оширмоқда. Масалан, ўтган йилнинг биринчи чорагида марказ хизматидан 5 минг китобхон фойдаланган бўлса, жорий йилнинг шу даврида 23 мингдан ортиқ кишига хизмат кўрсатилди. Вилоятда ўтказилаётган мазкур конференция бу борадаги ишларимизни қайта таҳлил қилиб, кутубхоначиларимизнинг малакасини янада оширишда муҳим аҳамият касб этди. Ўзбекистоннинг бошқа ҳудудлари ва хорижнинг илғор тажрибаларини ўрганиб, амалиётга жорий этишга қулай муҳит яратди», — дейди Адиб Собир Термизий номидаги Сурхондарё вилояти ахборот-кутубхона маркази раҳбари М.Абдушукуров.

Сурхондарё вилоятида 1 минг 100 дан ортиқ кутубхона ва ахборот-ресурс маркази китобхонларга хизмат кўрсатмоқда.

Анжуманнинг дастлабки куни бўлиб ўтган ялпи мажлисда мамлакатнинг етакчи олимлари ва мутахассислари, шунингдек Жанубий Корея, Покистон, Эрон, Россия, Қозоғистон, Тожикистон каби давлатларнинг тажрибали мутахассислари соҳага оид маърузалари билан иштирок этди.

Халқаро конференциянинг иккинчи куни иштирокчилар тўртта сексияга бўлиниб, «Ҳудудларда ахборот-кутубхона соҳасини ривожлантиришда янги тенденциялар: ўзаро ҳамкорлик йўллари», «Фан ва таълим ривожида ахборот-кутубхона муассасаларининг роли», «Ахборот-кутубхона муассасаларининг нашриётлар, архивлар ва музейлар билан ўзаро ҳамкорлиги масалалари: ҳукумат топшириқлари ижроси кесимида», «Технологиялар ва инновацияларни жорий қилиш – аҳолига ахборот-кутубхона хизмати кўрсатиш сифатини оширишда муҳим омил» каби мавзуларда фикр алмашди, таклиф ва тавсиялар билдирди. Тажрибали экспертлар юртимизнинг турли ҳудудларидан келган кутубхоначи-мутахассислар учун «EBSCO, Web of Siense  электрон маълумотлар базалари ва RDK диссертациялар электрон кутубхонаси билан ишлаш асослари» мавзуида маҳорат дарслари, семинар ва «E Line Press» компаниясининг фаолияти ҳамда лойиҳалари тақдимотини ўтказди.

Иштирокчиларнинг бўш вақтларини мазмунли ўтказиш учун қизиқарли маданий тадбирлар ташкил этилди. Меҳмонлар тарихий обидалар ва мустақиллик йиллари барпо этилган замонавий иншоотлар билан танишди.

«Президент Шавкат Мирзиёевнинг Тожикистонга давлат ташрифи мамлакатларимиз ўртасидаги иқтисодий-ижтимоий, сиёсий-маданий, илмий ва бошқа соҳалардаги ҳамкорликни янги босқичга кўтарди. Делегациямизнинг ушбу нуфузли халқаро конференцияда иштирок этаётгани бунга яққол мисолдир. Анжуманда соҳамиз бўйича фойдали маълумотларга эга бўлдик. Ўтмишдан дунё илм-фани, маданияти ривожига беқиёс ҳисса қўшиб келаётган воҳада мангу қўним топган азиз-авлиёларни зиёрат қилиб, сўнгги йилларда бунёд этилган замонавий иншоотлар билан танишдик. Асрларга татигулик ўзгаришлар юз бераётганини кўриб, қувондик.Адиб Собир Термизий номидаги вилоят ахборот-кутубхона маркази фондига мамлакатимизда янги чоп этилган 900 дона бадиий, тарихий, ҳуқуқий, илмий ва бошқа китоблар туҳфа қилинди», — дейди Тожикистон Фанлар академияси қошидаги кутубхона директори, филология фанлари доктори Шодимуҳаммад Сўфизода.