Бугунги кунда умумтаълим мактаби ўқитувчисининг ўртача ойлик иш ҳақи қанча?

ЎзА бугунги кунда умумтаълим мактаби ўқитувчиларининг ўртача ойлик иш ҳақи миқдорлари тўғрисидаги маълумотларни тақдим этди.

Бугунги кунда умумтаълим мактабларининг малака тоифага эга бўлмаган олий маълумотли бошланғич синф ўқитувчисининг ойлик маоши 1 133 700 сўмни, шу тоифадаги юқори синф ўқитувчисининг ойлик маоши 1 004 547 сўмни ташкил этади.

Шу билан бирга, Ўзбекистон Республикаси Вазирлар Маҳкамасининг 2005 йил 21 декабрдаги «Халқ таълими ходимлари меҳнатига ҳақ тўлашнинг такомиллаштирилган тизимини тасдиқлаш тўғрисида»ги 275-сонли қарорига мувофиқ умумтаълим муассасалари ўқитувчиларига қуйидаги қўшимча ҳақ тўланади:

• Синф раҳбарлиги учун – энг кам ойлик иш ҳақининг 100 фоизи;
• Дафтарларни ва ёзма ишларни текширганлик учун - энг кам ойлик иш ҳақининг 50 фоизи миқдорида.
• Мазкур қарорга мувофиқ умумтаълим муассасаларининг ўрнак кўрсатган ходимларини рағбатлантиришнинг директор жамғармаси маблағлари ҳисобидан базавий тариф ставкаларига:
• Тарбиявий жараён амалга оширилишининг сифати ва самарадорлигига, синфдан ташқари ишларга қўшилган аниқ шахсий ҳиссага қараб ҳамда синфдан ташқари ишлар учун 15 фоизгача миқдорда;
• Ўқитишнинг юқори самарадорлиги ва сифати учун 25 фоизгача миқдорда қўшимча устама белгиланади.

Ушбу иш ҳақи миқдорларидан солиқлар ва ушланмаларни чегириб ҳисобласак, бошланғич синф ўқитувчиси 1 312 620 сўм, юқори синф ўқитувчиси 1 195 607 сўм ойлик иш ҳақи қўлига олади», — дейилади хабарда.

Бундан ташқари, Ўзбекистон Президентининг 2012 йил 10 декабрдаги «Чет тилларни ўрганиш тизимини янада такомиллаштириш чора-тадбирлари тўғрисида»ги ПҚ-1875-сонли қарорига асосан умумтаълим муассасаларининг чет-тили ўқитувчиларига қишлоқ жойларда жойлашган таълим муассасаларида уларнинг тариф ставкаларига яна 30 фоиз ҳамда бошқа таълим муассасаларида 15 фоиз қўшимча ҳақ тўланади.