Ўтган ҳафтада Тошкент марказида 25 ёшли АҚШ фуқароси ўз бошқарувида бўлган Captiva автомобилида пиёда аёлни уриб юборган эди, деб ёзади «Podrobno.uz».
Жиддий жароҳат олган аёл шаҳар клиник шифохонасига олиб борилган, бироқ бир кундан сўнг шифохонада вафот этган.
Аёл пиёдалар йўлакчасидан йўлни кесиб ўтаётган эди. Ҳайдовчи ЙТҲ содир бўлган пайтда маст бўлмаган.
Мазкур ҳолат ижтимоий тармоқларда кенг муҳокама қилинмоқда. Аксарият интернет фойдаланувчилари америкалик эркак жазодан қутилиб қолиши мумкинлигини таъкидламоқда.
Ҳатто АҚШ фуқароси ўз кўрсатмасида марҳума йўлни кесиб ўтиш тақиқланган жойдан ўтганини маълум қилгани ҳақидаги гап-сўзлар ҳам пайдо бўлди.
Тошкент шаҳар ИИББ фуқароларни асоссиз маълумотларни тарқатмасликка чақирди ва ушбу ҳодисага тегишли барча деталлар чуқур ўрганилаётганини маълум қилди.
«Ҳолат юзасидан Captiva автомобили ҳайдовчисига нисбатан Ўзбекистон Республикаси Жиноят Кодексининг 266-моддаси (транспорт воситасини бошқарувчи шахс томонидан транспорт воситалари ҳаракати ва улардан фойдаланиш хавфсизлиги қоидаларини бузиш, одам ўлишига сабаб бўлса) 2-қисми бўйича жиноят иши қўзғатилган», — дейилади хабарда.
Маълумот учун, Жиноят Кодексининг 266-моддаси 2-қисмига кўра, транспорт воситасини бошқарувчи шахс томонидан транспорт воситалари ҳаракати ва улардан фойдаланиш хавфсизлиги қоидаларини бузиш, одам ўлишига сабаб бўлса етти йилгача озодлик маҳрум қилиш билан жазоланади.
Изоҳ (0)