Ўзбекистон ва Россия рейслар сонини кескин ошириш ҳақида келишиб олди

11 апрель куни Москвада Ўзбекистон ва Россия авиация маъмурларининг музокаралари бўлиб ўтди, деб ёзади Spot Россия транспорт вазирлигига таяниб.

Музокаралар давомида Россия ва Ўзбекистон авиаташувчилари учун рейслар сонини икки мартадан кўпроқ ошириш ҳақида келишувга эришилди, келишилган йўналишлар учун тижорат ҳуқуқларини кенгайтириш бўйича йўл харитаси имзоланди.

Аввалроқ Ўзбекистон ва Россия рейсларни кўпайтириш ҳақида келишиб ололмаётгани хабар берилган эди.

Россия белгиланган авиакомпанияларга частоталарни эркин танлаш ҳуқуқини беришни таклиф қилган, аммо Ўзбекистон дастлаб ҳукуматлараро битимларда ёзиб қўйилган келишилган линиялардаги парвозлар сонини аниқлаштириб олишни таклиф этган.

Россия Москвадан Самарқанд ва Бухорога бир ҳафталик рейслар сонини (ҳар биттасини) 14 тагача кўпайтирмоқчи бўлган, аммо Ўзбекистон тегишли равишда ўнта ва бешта рейсни таклиф қилган.

Шунингдек, Россия Москвадан Фарғона ва Наманганга бештадан рейс йўлга қўйилишини истаган, Ўзбекистон эса уч ва тўртта рейсни таклиф этган. Россия Санкт-Петербургдан Тошкент ва Самарқандга еттита рейсни йўлга қўймоқчи бўлган, Ўзбекистон эса бештасини таклиф этган.