Ўзбекистон Фанлар академияси Қорақалпоғистон бўлими қорақалпоқ гуманитар фанлар илмий-тадқиқот институтининг археология музейида сақланаётган Марказий Осиёдаги энг қадимий ушбу ёзув милоддан аввалги V асрга тегишли. Бу ҳақда Қорақалпоғистон ахборот агентлиги директори Есимхан Қанаатов маълум қилди.
1976—1977 йилларда профессор М. Мамбетуллаев раҳбарлигидаги археолог-олимлар гуруҳи Катта Айбуйирқалъани қазиш пайтида учта катта хум топиб олади. Бу хумларнинг сув ва дон сақлаш учун ясалганлиги аниқланади. Хумларнинг бирида тиғ билан битилган ёзувлар мавжуд эканлиги маълум бўлади. Яъни, бўйи 1 метр келадиган ўтда пиширилган хумдаги Қадимий Хоразм тамаддунига тегишли бу ёзувлар Марказий Осиёда энг эски ёзув сифатида фанда қайд қилинган эди.
Хум бир жойдан иккинчи жойга кўчирилиши пайтида синганлиги сабабли ҳозирги кунда бу бетакрор эсдалик реставрацияга муҳтож.
Ўзбекистон Фанлар академияси Қорақалпоғистон бўлимида бу каби ажойиб эсдаликларнинг базаси яратилган. Лекин қулай кўргазма жойи бўлмаганлиги боис кўпчилик бу эсдаликларни кўриш имкониятига эга эмас.
Ўз даврида Қадимий Хоразм цивилизацияси бешиги бўлган Қорақалпоғистон ҳудудида археология музейи ҳам қад ростласа, катта ишга асос солинган бўлар эди.
Изоҳ (0)