Қозоғистон элчихонасининг ҳарбий атташеси Қуролли Кучлар академиясига ташриф буюрди
Қозоғистоннинг Ўзбекистондаги элчихонаси ҳарбий атташеси, полковник Аскер Байсенов Қуролли Кучлар академиясига ташриф буюрди, деб хабар беради Мудофаа вазирлиги матбуот хизмати.
Қуролли Кучлар академияси мажлислар залида ҳарбий хизматчилар билан ўтказилган тадбирда ҳарбий атташе маърузаси тингланди. У ўз сўзида Қозоғистон Қуролли Кучлари таркиби, тизимда олиб борилаётган ислоҳотлар, ҳарбий хизматчиларнинг ижтимоий ҳимоясига қаратилган эътибор, аҳолининг, айниқса, ёшларнинг ҳарбий хизматга муносабати, мамлакатда ёшларни ҳарбий-ватанпарварлик руҳида тарбиялаш борасида амалга оширилаётган ишлар, Қозоғистоннинг халқаро ҳамкорлик доирасида ҳорижий давлатлар билан ўрнатган алоқалари ва улардан кўзланган мақсад, шунингдек, мамлакатдаги олий ҳарбий таълим муассасалари фаолияти ва у ерда курсантларнинг замонавий билим олишлари учун яратилган шарт-шароитлар ҳақида сўзлаб берди. Экранда намойиш этилган видеоролик ва слайдлар маърузачининг фикрларини янада бойитди.
Қозоғистон Республикасида ташкил қилинган мудофаа саноат комплекси фаолияти тўлиқ акс эттирилган фильм ҳарбий саноатга ҳисса қўшаётган институтлар, заводлар ҳақида маълумот берди.
