Бир гуруҳ ҳарбийлар 101 баҳорни қаршилаётган Иккинчи жаҳон уруши қатнашчиси, Мудофаа вазирлиги фахрийси Зубайдулла ота Тошматов хонадонида меҳмон бўлди, деб хабар бермоқда Мудофаа вазирлиги матбуот хизмати.
«Чирчиқ шаҳри Алишер Навоий кўчасидаги 46-хонадонга ташриф буюрган Тошкент ҳарбий округи фахрийлар ишлари бўйича кенгаши раиси Авазбек Номозов, Чирчиқ олий танк қўмондонлик-муҳандислик билим юртидан подполковник Бобур Ражабов, майор Жасур Ҳакимов ҳамда сержант ва офицерларни отахоннинг қизлари Мастура опа кутиб олди», — дейилади хабарда.
«Бугунги кунларни қаранг. Тинчликни, фаровонликни наинки одамлар ҳаётидан, балки осмонда парвоз этаётган қушлардан ҳам билса бўлади. Ёшлигимиз замбаракларнинг гумбурлаши, бомбаларнинг ерни зир титратиб, танкларнинг гувиллашлари, урушдан кейинги қийинчиликлар билан ўтди. Уруш кечагидек эсимда. Польшадан то 1945 йил 7 май куни Германиянинг Элба дарёси бўйидаги жанггача курашдик. Шу вақт оралиғида олти марта яраландим. Кечалари окопларда изғиб, қўлимизда қурол билан қачон уруш тугаркин, қачон ота-онамизнинг дийдорини кўрарканмиз, деб тонг оттирардик. Миллатимиз тинчликсевар халқ. Урушгача халқимизга собиқ тузум бошқача муносабатда бўлган. Босмачилар деган тамға остида яшаб, уруш бошланганда ўзбекистонликларнинг кучидан фронт ичида ҳам, фронт ортида ҳам фойдаланган. Юртдошларимиз жангда фидойиларча кураши билан эътибор қозонган», — дейди отахон меҳмонлар билан суҳбат қураркан.
«Еттита фарзанднинг отаси, 21 нафар невара, 45 эвара, 2 чеваранинг суюкли бобоси бўлган отахон гоҳида эвараларига уруш ҳақида эртаклар айтиб бераркан. Ҳа, айнан уруш ҳақида. Аслида миллионлаб инсонларнинг ҳаётида улкан қора чизиқ бўлган, бағрида кетмас доғ қолдирган уруш бу. Лекин бугунги ҳурликнинг эрка фарзандлари учун бу хотиралар чиндан-да, эртак», — дейилади хабарда.
«Биз бундай отахонлар билан кўпроқ учрашишга, уларнинг насиҳатларини ёшларга етказишга ҳаракат қиламиз. Улар тарихнинг тирик китоби, дейиш мумкин. Улардаги жасорат, матонат, юртга садоқат ҳар биримизга ўрнакдир», — дейди Тошкент ҳарбий округи фахрийлар ишлари бўйича кенгаши раиси Авазбек Номозов.
Изоҳ (0)