«Ўзавтотранс» агентлиги Қозоғистон инвестициялар ва ривожланиш вазирлигининг транспорт қўмитаси билан ҳамкорликда «Тошкент – Олмаота – Тошкент» халқаро автобус йўналишини очиш бўйича тайёргарлик ишларини амалга оширди. Бу ҳақда Ўзбекистон автомобиль транспорти агентлиги ахборот хизмати маълум қилди.
Лойиҳа Қозоғистон ва Ўзбекистон ҳукумати ўртасида 2017 йил 23 мартда Остона шаҳрида имзоланган 2006 йил 20 мартдаги халқаро автомобиль қатновлари тўғрисидаги битимга қўшимча ва ўзгартишлар киритиш ҳақидаги баённома ижроси доирасида амалга оширилмоқда. Халқаро автомобиль қатновлари масалалари бўйича ўзбек-қозоқ қўшма комиссиясининг йиғилишида эришилган аҳдлашувларга мувофиқ, мазкур йўналишни очиш юзасидан зарур йўналиш ҳужжатлари тайёрланди.
Йўналишда хизмат кўрсатиш учун ўзбек томонидан ташувчи сифатида Erkin Emina Express Tour МЧЖ белгиланди. Корхона қозоқ томони ташувчиси YuG Trans Line МЧШ билан Қозоғистон ҳудудида автобусларга хизмат кўрсатиш (автобуслар техник кўриги, ҳайдовчилар тиббий кўриги, автобусларни қўриқлаш ва ювиш) юзасидан ўзаро ҳамкорлик тўғрисида шартнома тузди.
Йўналиш масофаси 818 километрни, йўлдаги вақт эса 16 соат 30 дақиқани ташкил этади. Жадвалларда «Ғишткўприк» (Ўзбекистон) ва «Жибек жоли» (Қозоғистон) чегара ва божхона назорат пункти текширувидан ўтиш учун 30 дақиқадан вақт ажратилган.
Ташувчилар томонидан йўналиш бўйича йўл ҳақи нархи 100 минг сўм ва тегишли равишда 4000 минг тенге нархда ташилиши ташувчилар томонидан эълон қилинди.
«Тошкент – Олмаота – Тошкент» йўналиши очилиши 11 апрель куни соат 16:00 да бўлиб ўтади ва мунтазам қатновлар 12 апрелидан бошлаб «Тошкент» автовокзалидан кунига учтадан (соат 16:00, 17:00 ва 18:00 да) қатнов амалга оширилади.
«Олмаота – Тошкент» автобуслари қатновлари «Сайран» автовокзалидан амалга оширилади.
Изоҳ (0)