Суперлиганинг 5-туридан ўрин олган «Локомотив» — «Қўқон-1912» ўйини юзасидан ЎФА Тартиб интизом қўмитасининг йиғилиши бўлиб ўтди, деб хабар беради ПФЛ сайти.
Унда учрашув комиссарининг билдиргиси, ўйин қайд этилган видеоёзув кўриб чиқилди. Ўйинда «Локомотив» футболчилари Нивалдо ва Сардор Мирзаевнинг хатти-ҳаракатлари ўрганиб чиқилган ва шунга асосланиб, қарор қабул қилинди.
Унга кўра, Нивалдога нисбатан Интизом кодексининг 5.45 бандининг «м» қисми қўлланиб, 5 та ўйинга дисквалификация қилиш ҳамда 25 миллион сўм миқдорида жарима чораси кўрилди. «Локомотив» ўйинчиси Сардор Мирзаевга нисбатан эса Интизом кодексининг 5.56 банди қўлланиб, 10 миллион сўм миқдорида жарима чораси кўрилди.
Эслатиб ўтамиз, беллашувнинг иккинчи бўлимида, «Локомотив» ярим ҳимоячиси Сардор Мирзаев ёрдамчи ҳакам қароридан норози бўлиб, уни очиқчасига туртиб юборганди. Сўнгги дақиқаларда эса «Локомотив» ҳужумчиси Нивалдо рақиб дарвозабони Ўткир Юсуповга калла қўйганди.
«Championat.asia» нашри юз берган ҳолат юзасидан футболчиларнинг ўзидан интервью олди.
«Локомотив»га ғалаба керак эди, деб ўйлайман. Шунинг учун ҳам «темирйўлчилар» жонини бериб ўйнашди. Дарвозамизни ишғол қила олмагани учун алам қилган бўлиши мумкин. Нима бўлганини билмайман. Нивалдо қизил карточка олганидан сўнг футбол қоидаларига тўғри келмайдиган ҳаракатни амалга оширди. Нивалдони ҳақорат қилганим йўқ.Ўткир Юсупов, «Қўқон-1912» дарвозабони
Ўйин охирида кўп кураш бўлди. Рақиб дарвозабони мени «маймун», «негр» деб ҳақорат қилди. Мен ўзимни тутиб тура олмай бошим билан унга зарба бердим. Ўзимни йўқотиб қўйдим, буни тан оламан. Тўғри бу футбол қоидаларига тўғри келмайдиган иш. Мухлислар ва «Локомотив»дан узр сўрайман.Нивалдо, «Локомотив» ҳужумчиси
Изоҳ (0)