Ўзбекистон Президентининг «Балиқчилик тармоғини жадал ривожлантиришга доир қўшимча чора-тадбирлар тўғрисида»ги қарори эълон қилинди. Ҳужжат матни ЎзА томонидан келтирилди.
Ҳужжатга мувофиқ, Тошкент вилояти Қуйи Чирчиқ тумани ҳокимлигига суд қарори билан берилган мол-мулк ва ер участкалари, шу жумладан, сув ҳавзалари негизида «Балиқ ишлаб чиқарувчи» эркин иқтисодий зонаси ташкил этилади.
Балиқчилик тармоғини ривожлантириш мақсадида Ўрмон хўжалиги давлат қўмитаси балансида бўлган табиий сув ҳавзалари доимий равишда алоҳида фойдаланиш учун «Ўзбекбалиқсаноат» уюшмасига берилади.
Табиий сув ҳавзаларининг ижара тўловларидан келиб тушган маблағлар тўлиқ ҳажмда «Ўзбекбалиқсаноат» уюшмасининг Балиқчиликни ривожлантириш жамғармасига йўналтирилади.
2018 йил 1 ноябрга қадар мақсадга номувофиқ фойдаланилаётган табиий ва сунъий сув ҳавзалари хатловдан ўтказилади, уларни товар балиқлар ва балиқ чавоқларини етиштиришга жалб қилиш чоралари кўрилади.
Қишлоқ хўжалиги вазирлиги марказий аппарати тузилмаси таркибида 5 нафар штат бирлигидан кам бўлмаган Балиқчиликни ривожлантириш бошқармаси ташкил этилади.
2018/2019-ўқув йилидан бошлаб олий таълим муассасаларида балиқчилик соҳаси йўналишларида бакалаврларни тайёрлаш бўйича қабул квотасини камида икки баравар оширилади. Тошкент давлат аграр университетида камида 6 нафардан иборат магистратура курси ташкил этилади.
Арнасой қишлоқ хўжалиги ва транспорт касб-ҳунар коллежи ҳамда Қуйи Чирчиқ агроиқтисодиёт касб-ҳунар коллежи қошида балиқчиларни тайёрлаш ҳамда балиқчилик хўжалиги ходимларининг малакасини ошириш курслари очилади.
Қорақалпоғистон Республикаси, Бухоро, Тошкент ва Фарғона вилоятларида балиқчилик хўжаликларига ихтиопатологик хизмат кўрсатиш учун лабораториялар ташкил этилади.
Изоҳ (0)