Самарқандда чартер рейс билан Ўзбекистонга учиб келган япониялик сайёҳлар кутиб олинди

Туризмни ривожлантириш давлат қўмитаси, Ўзбекистоннинг Япониядаги элчихонаси ҳамда Самарқанд вилояти ҳокимлиги томонидан Япония халқаро туристик ассоциацияси билан ҳамкорликда жорий йилда ҳам кунчиқар юрт фуқароларининг тўғридан-тўғри парвозлар орқали Ўзбекистонга саёҳати йўлга қўйилди.

— Ўтган йил давомида 10 та чартер рейс орқали Япония фуқароларининг Ўзбекистонга саёҳати уюштирилган бўлса, бу йил қатновлар сонини 15 тага етказиш кўзда тутилган, — дейди Туризмни ривожлантириш давлат қўмитасининг Самарқанд вилояти ҳудудий бошқармаси бошлиғи вазифасини бажарувчи Дилшод Нарзиқулов. — Ушбу саёҳатларда 3000 га яқин японияликнинг мамлакатга келиши кутилмоқда. Сайёҳлар бир ҳафта давомида Самарқанд, Бухоро, Хива ва Тошкент шаҳарларида бўлиб, тарихий-маданий ёдгорликлар, миллий анъана ва қадриятлар билан танишади. Бу йил сайёҳлик йўналишлари ва дастурларини меҳмонларнинг талаб ва истаклари асосида, уларнинг қизиқишларига қараб ташкил этишга алоҳида эътибор қаратилди.

Япониялик сайёҳлар учун Самарқанд шаҳридаги Регистон майдонида маҳаллий уста-ҳунармандлар томонидан тайёрланган маҳсулотлар, миллий либослар намойиши, фолклор жамоалари чиқишлари ҳамда 3D шоу томошаси режалаштирилган.