Қирғизистон Ташқи ишлар вазирлиги 7 апрель куни ўзбек-қирғиз чегарасида юз берган ҳодиса муносабати билан Ўзбекистонга нота йўллади. Бу ҳақда, Қирғизистон Ташқи ишлар вазирлигига асосланиб, «ТАСС» хабар бермоқда.
«Ўзбекистоннинг Қирғизистондаги элчиси Қирғизистон ТИВга чақирилди, ҳодиса ҳақида хабардор қилинди ва унга ҳодиса тафсилотлари ҳақида ахборот бериш илтимоси битилган нота топширилди», — дейилади вазирлик ахборотида.
Қирғизистон ТИВнинг қайд этишича, расмий Бишкек «ушбу масалани назорат қилиб турибди ва икки мамлакатнинг тегишли хизматлари билан доимий мулоқотда».
Қирғизистон томони баёнотига кўра, 7 апрель куни Ўзбекистон чегарачилари Қирғизистон фуқаросига қарата ўқ узган; фуқаро шифохонада вафот этган. Ўзбекистон томони ўқ узилган вақтда фуқаро Ўзбекистон ҳудудида бўлганини таъкидламоқда.
Қирғизистон бош вазири Сапар Исоқов республиканинг тегишли тузилмаларига ушбу ҳодисани Ўзбекистон ҳуқуқни муҳофаза қилиш органлари билан ҳамкорликда изчил тафтиш қилиш бўйича топшириқ берган. Унинг кўрсатмасига асосан ҳалок бўлган фуқаронинг оиласига 100 минг қирғиз сўми (1,5 минг доллар) миқдорида моддий ёрдам ажратилган.
Изоҳ (0)