Жанубий Кореянинг Йоннам университети профессори, наманганлик ёш олим Алишер Дедаханов Marquis Who’s Who in the World («Маркуис: дунёда ким аслида ким») каталогига киритилди. Бу ҳақда «Дарё» мухбири Азизбек Абдувалиев хабар бермоқда.
34 ёшли Алишер Дедаханов АҚШдаги Marquis ноширлик уйининг ушбу нуфузли каталогига киритилган илк ўзбекистонлик ҳисобланади. Marquis Who’s Who in the World саҳифаларидан бизнес, юриспруденсия, фан, тиббиёт, санъат, бошқарув каби соҳаларда дунё етакчилари ва мутахассисларининг таржимаи ҳоллари ўрин олади.
У Тошкент давлат шарқшунослик институтини битириб, Жанубий Кореянинг Йоннам университетида таҳсил олди ва магистрликни эгаллади. Кейинчалик эса ўзи ўқиган университетда докторлик диссертациясини ёқлаб, 30 ёшида фалсафа доктори (PhD) даражасига сазовор бўлди.
Ўзи ўқиган университетга ишга қабул қилиниб, профессор-ўқитувчи вазифасига тайинлади. Ҳозирда дунёнинг турли давлатларидан келган талабаларга таълим бермоқда. 3 нафар докторант, 4 нафар магистр талабаларга мураббий сифатида илмий раҳбарлик қилмоқда. Йоннам университетидаги 885 нафар профессор-ўқитувчи орасида таълим бериш бўйича энг кучли 5 фоизликка кирган.
АҚШ, Буюк Британия, Янги Зеландия, Канада, Корея ва Норвегиядаги илмий журналларда корхоналарни бошқариш услуби, инновацион фаолиятга таъсир қилувчи омиллар ва шунга ўхшаш бошқа мавзуларда 10 дан ортиқ мақоласи чоп этилди. Улар дунё тадқиқотчилар эътиборини ўзига тортди ва ёш олим илм-фан йўналишига қўшган ҳиссаси учун АҚШ нашри саҳифаларидан ўрин олди.
Наманган шаҳридаги кўпчилик танийдиган зиёли оила — Тоҳиржон Дедаханов ва Дилором Шарофиддинованинг тўнғич ўғли бўлган Алишер Наманган муҳандислик-қурилиш институти «Менежмент» факультети талабалари учун онлайн дарс ўтиш режасини ҳам кўнглига тугиб қўйган.
Изоҳ (0)