Жорий йил 4—6 апрель кунлари «Ўзэкспомарказ» миллий кўргазмалар мажмуида озиқ-овқат саноати соҳасига ихтисослашган WorldFood Uzbekistan – 2018 халқаро кўргазмаси бўлиб ўтади. Бу ҳақда ЎзА хабар бермоқда.
Ўн саккизинчи бор ташкил этилаётган кўргазмада 26 давлатдан 200 га яқин компания иштирок этиши кутилмоқда. Улар орасида илк бор Беларусь саноатчилари ҳам қатнашади. Бу ҳақда кўргазмаолди матбуот анжуманида маълум қилинди.
— Бу йил кўргазма иш дастури жуда қизиқарли ва кенг қамровли бўлиши кутилмоқда, – дейди Iteca Exhibitions халқаро кўргазма компанияси бош директори ўринбосари Ойимхон Бобожонова. — Кўргазма аввалида озиқ-овқат маҳсулотларини сифатлаш «Сифат устаси» танлови ўтказилади. Унда озиқ-овқат ишлаб чиқарувчилар маҳсулотлари сифати ҳакамлар ҳайъати томонидан баҳоланади ва ғолиблар турли номинациялар бўйича тақдирланади.
Кўргазма доирасида Ўзбекистон — Беларусь саноатчилари халқаро форуми ўтказилиши белгиланган. Унда икки мамлакат ишбилармон доиралари вакиллари озиқ-овқат саноати бўйича ўзаро тажриба алмашади, савдо алоқаларини мустаҳкамлаш масалалари муҳокама этилади. Халқаро тадбирда қишлоқ хўжалиги маҳсулотлари етиштириш, уларни сақлаш, қайта ишлаш соҳасидаги янги технологиялар намойиш этилади.
Яна бир янгилик — Ўзбекистонда илк бор «Ритейл марказ» ўз ишини бошлайди. Бу марказ озиқ-овқат ишлаб чиқарувчилари ва савдо тармоқлари ўртасида маҳсулот етказиб бериш бўйича бевосита музокаралар майдони вазифасини ўтайди.
Изоҳ (0)