Миллий авиакомпания франциялик туроператорларни Париждан тўғридан-тўғри Самарқандга олиб келди

31 март куни «Ўзбекистон ҳаво йўллари» миллий авиакомпаниясининг Париж – Самарқанд қатновида Франциянинг Иль-де-Франс ҳудуди турагентлари уюшмаси (EDV) вакиллари Самарқанд ва Бухорода 31 мартдан 3 апрелгача бўлиб ўтадиган сайёҳлик конференциясида иштирок этиш учун Ўзбекистонга ташриф буюрди, деб хабар беради МАК матбуот хизмати.

«Самарқанд» халқаро аэропортида франциялик меҳмонларни шаҳар маъмурияти, «Ўзбекистон ҳаво йўллари» миллий авиакомпанияси ходимлари, Ўзбекистон туризмни ривожлантириш Давлат қўмитаси ҳамда ОАВ вакиллари карнай-сурнай садолари остида тантанали равишда кутиб олди.

EDV’нинг жорий йилдаги сайёҳлик конференциясини Ўзбекистонда ўтказиш ҳамда франциялик туроператорлар учун республика бўйлаб инфо-тур ташкил этиш ҳақида ўтган йилнинг сентябрь ойида «Ўзбекистон ҳаво йўллари» миллий авиакомпанияси ва Туризмни ривожлантириш давлат қўмитаси вакилларининг Иль-де-Франс турагентлари уюшмаси президенти билан Парижда бўлиб ўтган учрашуви чоғида келишиб олинган эди.

EDV’нинг мамлакатда бўлиб ўтадиган конференциясида Франциянинг 100 дан ортиқ сайёҳлик соҳаси вакиллари — Иль-де-Франс сайёҳлик агентликлари (Kuoni, Salaun, Club Midiya, Verdi Voyages) вакиллари, ҳамкор компаниялар (Amadeus, Hertz, Avis ва бошқалар), машҳур француз оммавий ахборот воситалари (Le Figaro, Tourism TV, Echo Touristique, Le Quotidien du Tourisme) мухбирлари, шунингдек, Ўзбекистоннинг етакчи сайёҳлик компаниялари ва агентликлари иштирок этади.